Okuyalulwa nokutseyika mUuyuni auhe

0
223

Momumvo 1971 shoka shaningwa papolitika kombinga yoSWAPO osho ye  a  li a hiywa opo a ka popithe Oraata yEgameno  yIigwana Hangano momasiku 5 Kotoba 1971. Shika oshali oshinima shopa ndjokonona, unene tuu sho ngame ndali omuAfrica gwotango a za kehangano ekondjelimanguluko ta ithanwa owina okupopitha Oraata ndjoka.Ongame awike ndali ndapewa ompito ndjika nonando omahangano gamwe gaakondjelimanguluko nago oga li ga ninga omaindilo opo ga popithe oshigongi shOraata yegameno.

Epangelo lyokatongotongo lya South Africa olya li lya tsondumbo  neithano ndyoka ndapewa kOraata yEgameno opo ndi keyi popithe.Nayo oya li wo ya hala okupopya wo komeho gOraata ndjoka,ndele nando ya kambadhala oya lombwelwa ashike kutya oyena okuninga eindilo lyokuholoka ashike mbala komeho goshigongi nokonima taya zimo moshigongi shoka shampa ya gandja ehokololo lyawo.Tse otwa kuutumba miipundi yetu nando South Africa okwa li a kondjitha nokunyenyeta oshoka tse pamwe nOraata yIigwana Hangano ya Namibia otse twa li aakuthimbinga ya simana moshigongi shika. Otwa li wo twa yambidhidhwa kOkomittee tayi kondjitha okatongo naandjoka tayi  longo okuhulithapo uukoloni [ndjika okwa li yi shiwike nawa ongo Okommitee 24].Omolwa eyambidhidho ndika Oraata yEgameno oya zimine opo tse tu kale moshigongi nonando South Africa okwa li ta popyapopya.Oya pitikwa ya leshe omukanda gwawo gwiiyetwapo nokonima yokugu lesha okwa tiwa naya pitemo moshigongi, omanga tse twa kala twa kuutumba moshigongi. Oya li ya kuutumba miipundi pondje yoshinyanga moka hamu gongalele Oraata yEgameno. Oshinima shika kutse oshali esindano enene lyetu unene momeho giilyo yOraata Yegameno nomuthika gwa South Africa ogwa gu pevi unene omolwa ondondo neyalulo ndyoka SWAPO a pewa .

Nonando Ominista Yiikwapondje  ya South Africa Hilgard Muller kali omugeyentu mokupopya nomiilongadhalwa ye okuyeleka nomutetekeli gwe Eric Louw, nguka okwa li naatondi aashona ihe okwa li mekondjo edhigu sho a kambadhala okupopila oshinima itaashi vulu okupopilwa.Kokutya uuyuni auhe owali tawu kondjitha omulandu gwokatongotongo omanga ye a li ena okugupopila kutya oshali tashi mu pula shike.

Pethimbo ndyoka South Africa okwa li muupongo keena we nando ookuume , naaBritania mboka petameko yali omahewa ge osho ye mwiidhimbike, na kaya li we ya hala okumonika taya popi naanambelewa ye, onkene mboka ya li nehalo okukundathana naanambelewa aaSouth Africa oya li ye na okushiningila mookolonela dhomomilema.Okuyeleka natse ondhilo yetu nomuthika gwetu ogwa yeluka nokutumba pombanda.Oshali esindano enene lyopaudiplomate kutse mokupopitha oshigongi shOraata Yegameno, naashika osha nkondopeke omutalelo gwekondjo lyetu. Monakuziwa ngame nosheendo shandje otwali hatu kala pevi okuyeleka niilyo yokommitee.Onkene petameko lyoshipopiwa shandje onda pandula sho nda pewa ompito ndjoka yowina  okupopitha Oraata Yegameno ongo omuwilliki gwotango gwaakondjelimanguluko.

Oshigongi shoka okwa li sha ithanwa okutala omikalo nkene oontokolwa dhoshigongi shaayehe noshowo Oraata Yegameno tadhi vulu okutulwa miilonga. Shika oshaningwa konima sho Ohofa yOpaigwana ya li ya gandja etokolo lyayo kutya okukala kwa South Africa kaku li we paveta, naanguka okwa li ena oshinakugwanithwa opo akuthemo elelo lye nosho wo iikuthemo moshilongo shika.

Moshipopiwa shandje onda li nda endulula onkundana ndjoka ya li ya shangwa moshifonkundana sho New York Times nokoshinyolwa hoka oko ndali nda kankamekele oshipopiwa ashihe shoka nda popi komeho gOraata Yegameno. Oshifo shika oshali shanyola sha ti .

“Netokolo ndika lyopandjokonona lyaapanguli 13 maapanguli 2 Ompangu oya kuthapo ofogo kehe yopaveta nenge yopapolitika ndjoka ya kala ya shiga omuthika gwokoloni nale yaNdowishi,”

Osha pumbwa okudhimbulukiwa kutya okuza tuu petameko sho Omukwaniilwa Hosea Kutako okupitila momukalelipo gwe Michael Scott naamboka ye mu landula mokufala iiyetwapo nyenyeto lyawo komeho gIigwana Hangano, oyali ye shi ningi taya longitha okatokolwa 39 komukankalandu gwIigwana Hangano kohi yontompolwa VII tayi popi kombinga yomainyengo taga yono ombili, nenge taga taaguluka ombili oshowo uuhwapindi.

Shika osha hwameke Oraata Yegameno opo yi uthe kutya opena onkalo yili oshiponga kombili, tayi yono ombili noshowo ya nika uhwapindi. Nomeutho ndika ngele iinima mbyoka oya monikamo nena otapa tokolwa pashitokolitho 41 opo kutulwe miilonga, oondjindikila,okuboikota kwopaudiplomate nenge ngele shoka hasho sha tokolwa otaku vulu okulongithwa okatokolwa 42 hoka ta ka ti iilyolongo otayi vulu okulongitha oonkondo okukalekapo nenge okugalulilapo ombili yopaigwana negameno.

Onkene hugunina ontokolwa ya shangwa kIigwana Hangano oya igidha kutya.

“Okukalamo kwa South Africa moNamibia shaali paveta osha puka na osho epogolo lyoshinakugwanithwa shopaigwana na South Africa ota kakala oye na okuhokolola komeho giigwana yomuuuyuni ngele iinakugwanithwa yopaigwana mbyoka yina okuningilwa aakalimo ya Namibia ina yi gwanithwapo,”na ishewe kutya ngele epangelo lya South Africa inaali kuthamo moNamibia, shika otashi ka eta onkalo ndjoka ombwiinayi mokukalekapo ombili negameno moshitopolwa”.

Onkene onda tula omuthindo omunene kontompolwa VII meindilo lyandje komeho Goraata yIigwana Hangano.

“Onkene aaNamibia oshowo aaholimbili muuyuni oya sindana mekondjo lyoveta. Nangashingeyi oshinakugwanithwa shOraata yIigwanahangano oku longa oshilonga shayo.Okutala kutya Iigwana Hangano oya taalelwa keshongo enene ndyoka tali gumu omakankameno omanene ngoka gadhikithapo ehangano ndika.Oraata yEgameno ndjoka yi na oshinakugwanithwa shokukalekapo ombili negameno muuyuni oyi na okukatuka oonkatu dhoshimati dho ishewe odhakola.

Pethimbo ndika itatu pula omishangwa tseyitho ndhoka dhaana oonkondo dhasha kwaamboka ya lala oshilongo shetu koonkondo.Tse onkene otatu indile olutu nduka lu katuke oonkatu dhokolela nodhomeendelelo pamautho gomikankankalelo opo lu tokole kutya opena eyonagulo lyombili nenge opena uuhindadhi , nuuna shika shaningwa nena oonkatu dhomondjila odhina okukatukwa.

Onda li nda ulike kutya South Africa okuli oshiponga kombili yUuyuni, unene sho tuu iihomateka nokomayego niikondjitho yoshinanena mbyoka yokuhanagula.Olutu otalu fatulula ngiini kutya South Africa ota kondjo moAngola, Mozambique, Namibia na Zimbabwe.Oshikwawo efatululo lini tali vulu okugandjwa kombinga yaSouth Africa sho ta tilitha iilongo yamanguluka moAfrica, oshiholelwa, omatilitho ganingilwa omuperesidende Kaunda gwa Zambia  ku Vorster gwa South Africa kutya ye ota ka dhengwa aluluma unene  kutya kena esiku neke shi dhimbwe.

Hugunina oshike tashi ka hupako moveta yopaigwana ngele iigawana  ya kalelwapo mpaka otayi  idhimbike okufatulula nawa ooveta dhuuyuni.

LEAVE A REPLY

Please enter your comment!
Please enter your name here