Oshikonga shokwoopaleka mOshakati

0
166

kuNuusita Ashipala

OSHAKATI – Aantu omathele oya li ya kutha ombinga miilonga yokwoopaleka ondoolopa yaShakati, mbyoka ya li ya longekidhwa kElelo lyondoolopa ndjoka oshiwike shayi.

Ondjambi yokwoopaleka Oshakati ndjika oya li nelalakano okuetapo elandulathano moshinima shoku ekelahi iiyagaya oshowo okukalekapo omudhingoloko gwayela. Oshikonga shika osha popiwa sha li esindano enene kelelo lyondoolopa unene tuu sho shaningile omasiku tashi tseyithwa kiikundaneki ya yooloka.

Oonakuwaimina Elelo lyOshakati oya li ya ende oshilando ashihe nokutoola iiyagaya ayihe mbyoka yili pevi  nomwiidhi mondoolopa ndjika.

Omupevi minister gwOmalelo gIitopolwa Niilando, Priscilla Beukes okwa li uuvitile nawa ondjambi  noshikonga shika na unene tuu sho ondoolopa ndjika ya shoneka oshinima shokutungapo iilongithwanima yoshigwana oshowo okukalekapo omudhingoloko gwayela.Okwa indile Elelo lyOshakati opo li tsikile nokukaleka po uuyogi momudhingoloko gwondoolopa ndjoka.

 “Onkene otandi indile Ewiliko lyOshakati opo li tsikile nokukumika aakalimo naatalelipo ya kaleke ondoolopa ndjika ya yela nawa, kutya nee omagumbo gawo, oongeshefa dhawo  oosikola noshowo omidhingoloko dhomomapandaanda nadhi kale dha yela  oshoka uuyogoki ohawu humitha komeho nawa onkalamwenyo yina uundjolowele wuli nawa,” Beukes  a ti.

Okwa kumike noku indila aakalimo noshowo oshigwana shaanangeshefa opo shi tale eopaleko nenawapaleko lyomidhingoloko dhawo  ongo oshinima sha simana. Oshoka ondoolopa ya yela ohayi nana aapunguli oyendji.Naashika otashi koleke omahupilo gondoolopa kehe uuna muyo tamuya aanangeshefa oyendji okupatulula oongeshefa dhawo.

“Kapena omuntu a hala okukala mondoolopa ya luudha oshowo okweetamo ongeshefa ye opo yi longele moshilando sha kaka. Onkene ngele ondoolopa yeni omweyi kaleke ya yela, nena ndjika otamu ka hila aapunguli naanangeshefa oyendji, mboka ta ye ya okupatulula oongeshefa nongeyi okuetapo oompito dhiilonga noku endeleleka ekoko lyomahupilo gomondoolopa oyo tuu ndjoka,” ta gwedha po ngaaka.

Beukes okwa indile aakalimo yomoshilando opo ya kale taya longitha omandoloma giiyagaya mokuekelahi iiyagaya ndele, ya umbile iiyagaya noshowo oombapila shaampoka yewete pena ehala lyeeguluka.

Beukes okwa tula wo miilonga ethigathano  moka osikola ndjoka ya yela nawa oshowo oongeshefa mbali  niiputudhilo nenge oombelewa dhontumba tadhi ka sindana omapole molupe lwomakopi haga yugathawna.

Omunambelewa omukuluntupitithi gwelelo lyOshakati Werner Iita okwa ti omakopi  ngoka otaga lalakanene okuhumithakomeho uuyogoki. Okwa ti nonando ethigathano otali ningwa ashike lumwe, ewiliko lyondoolopa otali tsikile okukaleka ondoolopa ya yela no ya yoga ethimbo alihe.

Caption:

Ominista yOmalelo Giitopolwa, Iilando, Omagumbo Neyokomeho lyOkomikunda, Priscilla Beukes pamwe na Gavena gwoshitopolwa  Oshana Clemens Kashuupulwa ya kwatela komeho ondjambi yeopaleko mOshakati.

LEAVE A REPLY

Please enter your comment!
Please enter your name here