AaNamibia ya indilwa ya kaleke manga okukatalelapo koNigeria

0
169

KuKuzeeko Tjitemisa

WINDHOEK – Uuministeli Wuukalinawa owa indile aaNamibia mboka haya ka talelapo koNigeria omolwa omatompelo gopambepo noshowo omagalikaneno ngoka haya ningilwa kOmuuvithi TB Joshua ya kaleke manga omalweendo ngoka.

Minista Richard Kamwi okwa ningi eindilo ndika a ti aatalelipo yokoshilongo shoka hoka haya yi ya ka pangwe pambepo oshowo haya ka galikanenwa naya kaleke manga omatalelopo ngoka sigo uuna ndoka ekalepo lyomukithi gwoEbola lya shunithwa pevi. Omundohotola Kamwi okwa ningi eindilokumagidho ndika konima sho omukiintu gwomimvo 49 omuNamibia a li a thiki pokapale koondhila kopaigwana ka Hosea Kutako okuza koNigeria hoka a yile komagalikaneno.Omukiintu nguka okwa thikile pokapale ka Hosea Kutako momasiku 5 Auguste 2014 okwa li a tulwa moshipangelo shepangelo uule womasiku omilongo 21 opo ku talwe ngele pamwe okuna omandhindhiliko guuvu wEbola omanga inaa pitikwa okuya koyaandjawo.

Oshiwike ishewe shaziko aaNamibia ye li omilongo 20 oya li ya galukile kegumbo okuza komalongeloKalunga ngoka haga ningwa komuuvithi gwevangeli okupitila moTiivii TBJoshua omuNigeria. Ayehe mbaka oya li wo ya konakonwa okutalika ngele otashi vulika taya ulike omandhindhiliko guuvu wEbola. Na inaya monika omandhindhiliko gasha guuvu mboka nando. Kamwi okwa galikana aaNamibia opo yaa itule moshiponga okuya koNigeria oshowo kiilongo yokuuninginino wAfrica hoka kuna omukithi gwEbola.’Okutalelapo iilongo mbyoka otaku etele oonakutalelapo ompito ompu yokukwatwa komukithi ngoka gwEbola, oshowo okugu taandelitha moNamibia. Omunashipundi gwongundu yUundjolowele yOpashigwana ndjoka ya langela komauta kombinga yomikithi dhomukwayu, omundohotola Jack Vries okwa koleke oshinima shika kutya omuNamibia gwomimvo 49 okwa li a tulwa mokwalantine nenge iikalekelwa uule wiiwike itatu moshipangelo shopokati shepangelo moVenduka okukala ta talwa ngele pamwe ota ulike omandhindhiliko goEbola uule womasiku ngoka omanga inaa ethiwa a shune kegumbo.Vries okwa ti okutula omukiintu nguka inaa tumbulwa kedhina kakele kokutya nguka okuna omimvo 49 osho owala okugamena oshigwana mokutala nawa kutya ita ethiwa inaa konakonwa nawa ngele pamwe otashi vulika a etelela ombuto ndjoka koNamibia. Konima yomasiku omilongo 21 ngoka, a kala moshipangelo, omuNamibia nguka ina monika sha shina ekwatathano nomukithi ngoka na okwa li a lalekwa aye kegumbo Etiyali lyoshiwike shika.

“ Itandi ku lombwele kutya nguka oye lye, shoka tandi ti ooshoka kutya omunamimvo omilongo 49, okwa li a kwatelwa moshipangelo  shepangelo uule womasiku ngoka opo a talwe ngele okuna omandhindhiliko guuvu mboka nenge ahawe ,“osho omundohotola Vries a popi.

Okwa ti nguka ina monika sha onkene okwa lalekwa nale okuya kooyaandjawo.Okwa gwedhako a ti omuNamibia kehe ngoka taka talelapo kiilongo mbyoka ya gumwa kuuvu wEbola ngaashi Nigeria, Guinea, Liberia, na Sierra Leone otaya ka konakonwa wo omanga inaa ya pitikwa ya shune komagumbo gawo uuna ya galukila moNamibia okuza komatalelopo kiilongo mbyoka. Oshiwike shika epangelo olya tseyitha kutya itali ka pitika we aatalelipo taya zi kiilongo mbyoka yina uuvu woEbola sigo uuna ndoka oondjindikila ndhika dha kuthwapo.Epangelo olya tula wo omashina gokutala epupyalo lyomuntu pomiyelo dhopoongamba puupale wopaigwana moVenduka, Ombaye, poongamba dhopoShikango nosho tuu okutala aatalelipo mboka taya piti ngele oye na omandhindhiliko ngoka.

Sigo oshiwike shika moNamibia kamwali mwa lopotwa oshiningwanima shuuvu mboka natango. Kakele uuvu mbuka okwa lopotwa wa monika wa holoka moRepublika yuuDemokoli ya Kongo, naashika oshewu eta popepi noongamba dha Namibia.

LEAVE A REPLY

Please enter your comment!
Please enter your name here