Geingob a indile aanona yomekondjo ya shune komagumbo

0
198

Komutoolinkundana

WINDHOEK – Ominista Onkuluntu Omundohotola Hage Geingob okwa ti edhipago lyopashiponga lya nakusa Frieda Ndatipo otali nikitha oluhodhi na okwa galikana aanona yomekondjelomanguluko ya shune komagumbo gawo omanga oholomende tayi tala komaindilo noompumbwe dhawo.

Geingob ngoka a ulike a hendwa komwenyo koshinima shika okwa popitha Oshigongi Shopashigwana oowili dhimwe dhimwe konima sho oshiponga shika sholuhodhi shaningwa sho Frieda Ndatipo a yahwa okusa.Okwa ti “Ndika eso lyoshiponga na oshiningwanima  tashi indilitha edhiminopo kwaamboka yeshi ningi pamupya. Shika oshiningwanima shoka inaashi pumbwa okututopagula ndele osha pumbwa okutu manga kumwe opo tu ikwate miikaha nokupulakenathana,” 

Nakusa Ndatipo gwomimvo omilongo 26 okwa yahwa okusa komunambelewa gwopolisi mEtitatu oshiwike shika pethimbo lyomahilathano ngoka ga holoka konima sho aanona yomekondjelomanguluko ya holola omadhiladhilo gawo esiku ndyoka. Opolisi naanona mbaka oya li ishewe ya palamenathana mEtiyali  pethimbo lyesiku lyOmapendafule, sho aapolisi ye ya kuthapo poombelewa oonene dhoSwapo, mpoka ya kala ya yunga ontanda ongo oshitopolwa shawo shehololomadhiladhilo mesiku lyOmapenda.  

Ookatelekonawa oya ti aanona mboka anuwa oya umbu opolisi nomamanya  yo opolisi mokuyamukula oya kuthamo oondjembo dhayo , naashika osho shafala meso lya Frieda Ndatipo. Nguka okwa li omukalimo gwokOlukulo moshikandjohogololo sha Kongo moshitopolwa shaHangwena, ye othigwa ndjoka ya thikile moVenduka omumvo 2013.

Eso ndika olya hili mbala ookomenda dhopapolitika oshowo omipopyo dhaahwahwameki yopapolitika, naashika osho sha  inyengitha Geingob opo a tye. 

“Opena mboka ya kutha ompito ndjika okulongitha omadhiladhilo ga loloka  gongundu yaagundjuka mbaka okuya tsitsimika, opo ya tule omutalelo gwepangelo momuzizimba omwiinayi.Okulongitha oshiningwanima shoMetitatu okuhumitha komeho ehwahwameko lyopapolitka  itashi ka thiminika epangelo opo li taambe noku zimina shoka tashi pulwa kwaamboka,’

Konima yoshiningwanima shika aanona mbaka oya ka monika taya imbi omaimbilo gekondjelomanguluko omanga yamwe yali taya lili oshilyo shongundu yawo.Oya li wo ya indile opo omupolisi ngoka a dhipaga anuwa omugundjuka nguka a pangulilwe edhipago.

 Omupolisi omukuluntu mokukondjitha iilonga yiikulumuna moshitopolwa sha Khoma, Komissina Gwopevi, Sylvanus Nghishidimbwa okwa li a kambadhala oonkambadhala inaadhi pondola sha okuuvithako aanona mboka opo ya  thigepo ehala ndyoka omanga aapolisi taya longo iilonga yawo. “Shoka shaningwa nena mpaka kashali oshinima sha longekidhwa kopolisi, oshoka opolisi kaya li ya thaneka okudhipaga nando omuntu nenge ogumwe, onkene otandi mu indile opo mu shune koontanda dheni omanga tse tatu longo iilonga yetu  nokutala kutya otatu yi ngiini okuza mpaka. Aantu nee, omwa pumbwa okungungumana oshoka itatu vulu okuopaleka epuko limwe ndika noku longa epuko ekwawo,” osho Kommisina gwopevi eya galikana. 

Ongundu ndjika oya ti oya yile koombelewa dhoSWAPO okuka tala kutya oshike shaningwapo komauvaneko ngoka ya li ya ningilwa koSwapo anuwa kutya otaya ka pewa iilonga.

“Otwe ya mpaka okumona Amushanga Ndjayi gwoSwapo Nangolo Mbumba ndele inatu vula okumu mona omolwa opolisi. Tse ka twa li twa homata ishewe aapolisi oya li yetu hadha komalutu getu, sho tweya na ina ya adha ko nando oondjembo nenge iikondjitho yilwe, ngashingeyi otaya fundju kutya yamwe yetu oya li noondjembo. Oya hala ashike okugamena ombinga yawo,’ osho gumwe gwaanona mbaka a ti. 

“Ometiyali twali twa dhimbulukwa esiku lyomapenda nena otamu dhipaga aanona oyana yomapendafule ngaka mwali mwa dhimbulukwa omasiku hamale, osha kwatha shike nee okudhimbulukwa  esiku ndyoka,” osho gumwe gwaambaka  a igidha omanga Nghishidimbwa teya popitha. Omuprima okwa ti epangelo olya uvako konkugo yaagundjuka mbaka ndele oli shishi woo kutya olina oshinakugwanithwa shoku kwatha nokulonga muuwanawa woshigwana ashihe sha Namibia.”Aagundjuka mbaka onkene otaya indilwa opo ya shune komagumbo gawo  omanga oholomende tayi ipyakidhile noku monena oshikumungu shawo eyamukulo tali kalele uuna ethimbo lya thikana,’ Geingob eya indile.

Epangelo itali shuna monima megameno lyomaliko gopaumwene oshowo ekalekepo lyompango nelandulathano,osho  Geingob a ti.Okwa gwedhako noku tya “ Itatu vulu okuetha Namibia opo a ninge oshilongo sha vundakana,’. 

Okwa ti ombelewa ye oya li ya shangele kiikondo ayihe yepangelo opo mbika yi itulile omitengenekothaneko dhiimaliwa okukuta yamwe yomaagundjuka mbaka. Ndele nee ekuto lyata ngaaka otali ningwa uuna pena iimaliwa okufuta oondjambi dhaamboka ya kutwa miilonga mbyoka. Oshowo okukutwa miilonga yopolisi nuukwiita  moka aakutwa haya konakonwa ngaashi sha pumbiwa. “Otandi indile ishewe aagundjuka mbaka opo ya shume komagumbo oshoka epangelo oli ipyakidhila noshikumungu shawo opo li shi monene omayamukulo. Otatu tungu oshigwana onkene inatu pumbwa okukala nekondjithathano. Otwa simaneka aagundjuka yetu ayehe mboka ya valelwa mekondjo naamboka wo ya valelwa meni lyoshilomgo,” Geingob a kwashilipaleke.

LEAVE A REPLY

Please enter your comment!
Please enter your name here