Ohango ya shituka oluhodhi

0
423

KuMaria Namupala

ONAYENA – Oshituthihango oshali sha shituka eyeme sho omulumentu goomvula omilongo mbali na ndatu ( 23) gomomukunda Onampadhi mOniipa, ali asi eso lyombaadhilila sho ali a tsuwa nombele komukwashigwana gwaAngola. 

Oshiningwanima shika oshali sha ningwa kongulohi yEtitano ndika lya ziko.

 Shino  oshali sha ningwa manga aantu yali taya tyapula ohango megumbo lyontumba pOniipa mpoka. Johannes Mbike okwali a hulitha ashike pethimbo ali a tsuwa nombele montulo komukwashigwana gwaAngola ngono taku hokololwa ali ha takamitha iimuna megumbo limwe pOnampadhi.

Sakaria Mbike mumwayina gwanakusa ngoka a gandja ehokololo okwati Johannes okwali a ya kohango puushiinda nokonima oya ka kundana owala onkundana ombwinayi noyoluhodhi kutya Johannes okwa hulitha sho a tsuwa nombele  ye opo a hulithile pehala mpo.

“Kapuna naanaa uuyelele wa yela kutya osha ende ngiini ashike kuuyelele mboka twa monopo otawu hokolola kutya omufekelwa nguka okwa kala ta  piyaganeke puundingosho ethimbo lyomutenya nokomatango okwa yi kegumbo hoka kuna ohango,” Sakaria tati ngaaka.

Omanga aantu yali yi ipyakidhila nokuligola yo yamwe yeli momatsali taya kugilile nani hwiya iilonga yi nyanyaleka otayi longwa. Gumwe ngoka a pulwa nokwa tindi a tumbulwe kedhina okwati Johannes nomufekelwa inaya nyenyeta ando. “Omufekelwa nguno okwali ashike eya ta kwata omukadhona gwaJohannes nokonima Johannes okwa li emu ningi anuwa omashendjo kutya omolwashike ena ku kwata omukadhona gwe ngoka taku hokololwa ena epunda lye, oyali ya zipo putse otatu ti ngaa pamwe oyayi owala pondje ya ka kundathane ashike nani Johannes okwa ka tsuwas owala nombele nokusa ngaaka,” gumwe ta hokolola ngaaka.

Otaku hokololwa kutya omukwashigwana nguka gwAngola sho a tsu Johannes ngeyika okwa li aka lopota oshinima shika megumbo naasho aantu ye keya poshiningwanima konima yothayila oya adha Johannes a hulitha nale noku ithanwa owala opolisi yi ye yi kuthepo omudhimba. 

Omufekelwa moshinima shika okwali a kwatwapo esiku olyo tuu ndyoka noku falwa kondjedhililo.

Omuvali gwanakusa meme Frieda Indongo okwati oshinima shika oshemu henda komwenyo oshoka kali eshi tegelela nande, ta holola kutya nonande a nika uuthigwa omolwa eso lyokamwana kenawe shoka ta vulu okuninga oshoka sha longwa shapwa ota indile owala oonkondo komushiti ngoka eli omuuthi gwaashihe.

Opolisi yaShana oyali ya kunkilile aantu opo ya yande oku kala niilwitho pethimbo lyiituthi yomanyanyu.

LEAVE A REPLY

Please enter your comment!
Please enter your name here