Oiponga yoituwa tai limbilike pEtope

0
191

KuHelvy Shaanika ONGWEDIVA – Ovakalimo vopomikunda Onangwe nEtope, nopomudingonoko oveli monghumwe nomoutile omolwa oiponga yoituwa oyo tai ningilwa ponhele imwe i li popepi nomikunda odo, hainingwa konima eshi ovanhu ile oihakanwa ya mona oinima tai tilifa. Nonande opolifi ina i shilipaleka omapopyo aa, vamwe vomomikunda edi ota va ti oku tameka odula yadjako, ponhele opo oha pa monika oihayotwa, no muimwe yomoiponga oyo ya ningilwa po oihakwanwa yoiponga oha i hokolola kutya oituwa yayo oya kandoma konima eshi ya mona oinima i kumwifa. Moiponga oyo ta i limbilike omwa kwatelwa osho sha ningwa Omaandaxa oshivike shadjako, omo mwa xulifila Simson Nghiwanapo (42) na Pendukeni Nghiwanapo (24), ava vavali aveshe ovalumenhu. Omukainhu, omunamido 27, wedina Hambeleleni Hangula okwa mona oshiponga mokuulu kwokolumosho. Ovakwashiwana ta va hokolola kutya, ova yandja olefa kokakadona keheshivike, vadja nako pOndombe taka ti oka yuka lwokomikunda davo. “Vati eshi etuwa la kandoma, okakadona naapa ka yuka opo ngaho pehe shivike, no ina ka monika vali fiyo okeluwa eli. Poima opo eshi pa kala ina pa kala nande pena oupyakadi washa, ashike okudja oudwaali opa tameka pa monika oinima ta i tilifa,” omukwashiwana oo ina hala edina laye lishivike ta hokolola. Ouyelele ou kawa li tau dulu oku shilipalekwa kopolifi ile kwaavo va li mo moshiponga. Ouyelele oo wa yandjwa kopolifi yaHangwena ota u ti okwa patululwa oshibofa shonomola CR38/08/14, momafiku August 18, 2014, omolwa oshiponga osho sha holoka lwopotundi 20h00 pomukunda Etope mOshitukulwahoololo Ondobe. Opolifi ota i hokolola kutya, omushingi wotuwa yoToyota Rav4 yonomola N927KR, okwa nyengwa okupangelela oshiendifo ponhele opo ondjila ya ngolyoka, hano pondalae, osho sha eta opo shi fiye po okapate komamanya, tashi alangate nokudipaa omushingi nomutwaalelwa waye umwe poshikando. Ovakwashiwana ova lombwela Kundana kutya aveshe ovo vali moshiponga ovomeumbo limwe, noonakufya ova pakwa mOlomakaya. Otaku hokololwa yoo kutya, omafimbo kemale eshi ponhele tuu opo, opa li pa kandomena otuwa natango oufiku. Omushingi vati okwa mona oshiima shafa ondjaba sha fikama mopate, ashike ngeno eshi a ka kendabala eshi henuke, otuwa oya wako kopate, tai kandoma, nokualangata. Elao linene, omushingi ou inamona oshiponga shasha.

LEAVE A REPLY

Please enter your comment!
Please enter your name here