Oshitopolwa shOmusati osho enyakwa lyuudhano wekopi lyoSkorpion U-17

0
298

WINDHOEK- Aadhani yetanga lyokoompadhi yoshitopolwa shOmusati oya dhana nawa nokudhengamo ospana ya li yina omanganga yokoshitopolwa sha Hardap nookoola 2-1, nongeyi oya ningi enyakwa lyonuumvo lyuudhano mbuka wa kwashilipalekwa kehangano lyomina ya Skorpion. Uudhano owa li wa dhanenwa pokapale ka Sam Nujoma moVenduka na owa hulu Etiyali oshiwike shika.

Uudhano waa dhani tanga kohi yomimvo 17 owa mono sho Daniel Kamanya na Natanael Nghifikwa ya thangelemo ookoola yimwe kehe gumwe muudhano wa hugunina  noku etela oshitopolwa shawo esindano. 

Uudhano mbuka owa li wa dhanwa we eguluka sho etanga lya kala tali thangwa okuza kombinga yimwe yokapale okuya kombinga onkwawo. 

Kamanya nomudhani omukwawo Tuhafeni Amushila oya li taya fuula nomikalo ndhoka yo ya li ya ulike uunyakwa wawo uuna taya undula etanga.

Oshitopolwa sha Hardap inashi dhengwa anuwa sho kaashishi okulyata okatanga aawe, osha dhengwa molwashoka shaningi omapuko mokugamena okoola yawo pomathimbo ngoka shali sha pumbiwa lela, ngaashi sho aagameni ya Hardap ya gandja etanga peke kaadhani yospana yokOmusati sho mbaka ya nyengwa okulithangela kokule nokoola yawo uuna shali sha pumbiwa ye shi ninge.

Omuthangelimo gwookoola gwospana ya Hardap ,ye oye wo kapitiya kospana ndjoka , Brendon Kotungondo oye a tulamo okoola yospana ye oyo ayike konima sho a pewa a etanga ewanawa ku Franco Slinger kombinga yokolulyo  lwokapale koshitopolwa hoka kwa li taku ziilile aadhani yokOmusati.

 Hardap okwa li a kondjo noongolo dhomaako opo andola a tulemo okoola ontiyali wo uudhano wu ye kethimbo lya gwedhwako ihe aawe aadhani yokonima yOmusati oya li ya gamene okoola yawo ya tula ombunda moshihwa nongeyi oya keelele aa Hardap yaa tulemo okoola ontiyali, oshoka oya kala nokugamena yaana ezimbuko sigo uudhano wa thiki pehulilo.

Omugameni gwospana yaMusati nakapitiya kospana ndjoka, Henock Aushona, Moses Simon na  Thomas Simeon, olya li lya kwata pevi sigo opehulilo. 

Omanga Petrus Josua omudhani gwomokati kokapale oye a li a pewa oshilonga shoku keelela omutilomo gwookoola gwokoHardap Kotungondo.

Nonando Kotungondo a kala nokuhenuka  Josua nokwe shipondola okutulamo okoola yimwe Josua oye a li a nyanyukwa molwashoka ospana ye oyo ya sindana nokuninga enyakwa lyuudhano mbuka opo wa dhanwa oshikando oshitiyali nuumvo. Omusati ogwa pewa oodola omayovi 20 oombandi dhoshingoli, nekopi hali taambathanwa, omanga Hardap okwa pewa oombandi dhoshisiliveli noodola omayovi 10.

Oshitopolwa sha Khomas osha hekelekwa noombandi dhoshikushu sho sha dhengemo shoka shErongo nookoola 4-1 okukondjela ehala etitatu.

Omapapa galwe oga pewa Simon Moses gwokOmusati oye omudhani dhingi guudhano wa hugunina  Kamanya oye omudhanidhingi gwotonamende ayihe,  Kotungondo ongo omutulimo gwookoola odhindji muudhano mbuka ospana yOmusati ongo ndjoka ya dhana nombepo ombwanawa oshowo omukwati gwospana yOtjozondjupa, Abel Paulus ongo omukwati dhingi gotonamende ayihe.

 

LEAVE A REPLY

Please enter your comment!
Please enter your name here