Ospana yaakadhona ya Namibia ya kanitha omaudhano agehe moChina

0
197

WINDHOEK – Ospana yetanga lyokoompadhi yaakadhona yomimvo dhili kohi yomulongo 15 oya kanitha uudhano wawo oMaandaha oshiwike shika sho ya dhengwamo kospana ya  Papua New Guinea nookoola 3-2 muudhano wawo uutitano nuutihamano pethimbo lyuudhano wOlympika yaagundjuka ndjoka ya hulu ohela moshilando sha Nanjing moChina.. 

 Ospana yaakadhona yaNamibia oya li ya dhengwa ookoola 9-0 ku Mexico  momasiku 17 Auguste omanga muudhano wawo uutiyali aakadhona oyo tuu mbaka oya dhengwa ishewe ookola  10-0 kospana yaadhanitanga aakadhona yoko China momasiku 20 Auguste.

Sho ospana ndjika ya dhana naandjoka ya Papua New Guinea oMaandaha oshiwike oya li ye shi pondola okutulamo ookoola mbali dhotango muudhano wawo methigathano ndika. Ookoola odha tulwamo ku Ignacia Haoses na Ivone Irene Kooper. Ihe nando ongaaka Papua New Guinea oye a sindana po uudhano mbuka  sho eshipondola okutulamo ookoola 3-2. Uudhano wOlympika yaagundjuka ohau  longekidhwa kOkommittee yOpaigwana yOlympika, naambuka owuna omaludhi gayooloka guudhano.  

Okudhengwa huka otaku ti Namibia okwa manitha uudhano mbuka waagundjuka  metanga lyokoompadhi inaa monamo nando esindano lyasha, na okwa ethelemo ookoola adhihe kumwe 22 momaudhano gatatu nokweshipondola ashike okutulamo ookoola mbali adhike ..

 Momaudhano galwe omuumbi gwegonga gwa Namibia, Eugene Niemann okwa manitha uudhano pehala etiheyali moshitopolwa sha B. Okuza tuu nkene uudhano wa tamekele Namibia ina sindana nando ombandi yasha.

 Uudhano waagundjuka mbuka ohau dhanwa konima yomimvo ne kehe haku ningi wa dhanwa pothinge oshowo pokufu ngaashi ashike mboka waakuluntu osho hawu dhanwa  konima yomimvo  ne kehe. Shika oshikando oshitiyali uudhano mbuka tau dhanwa pothinge sha landula mboka wopothinge wa dhanenwe moSingapore 2010. Uudhano owa li wa tameke  momasiku 16 gomwedhi nguka na owa hulu ohela.

LEAVE A REPLY

Please enter your comment!
Please enter your name here