Quigg ota ka kondjitha omudhengingonyo gulwe keeshiwe Ambunda

0
238

KuOtniel Hembapu

WINDHOEK – Ya  shuna ishewe petameko momalongekidho ngoka ga li ga ningilwa enyakwa nale lyuuyuni lya Namibia mondjundo yo bantamweight, Paulus The Rock Ambunda. Nguka okwa li momalongekidho goku ka kondjitha omumbokisi omuBritania gwedhina Scott Quigg molwepaya lyondjundo yolutu lwoongonyo lwoWorld Boxing Association (WBA) Super Bantamweight. 

Ambunda okwa li a mono oshiponga pethimbo ta idheula moku ilongekidhila olugodhi ndoka na okwa li a thiminikwa okupula Quigg ngele otashi vulika olugodhi nduka lu undulilwe komeho.

Olugodhi lwawo olwa li luna okukalako momasiku 13 gomwedhi tuuka, ndele ngashingeyi Ambunda okwa thigwa pomutenya oshoka , Quigg okwa tindi opo olugodhi ndoka lu undulilwe komeho na okwa ti ye otayi komeho nalwo mokukondjitha omumbokisi Stephane Jamoye omukwashigwana gwa Belgium esiku olyo tuu ndyoka.

Shika enyakwa lyuuyuni mondjundo yoWBA Super Bantamweight, Quigg olye shi tseyitha Etiyali oshiwike shika  kutya  olugodhi lwalyo na Jamoye otalu kalako momasiku 13 Septemba  moManchester ngaashi sha li sha longekidhwa.

Omuwiliki nomudheuli gwa Ambunda , Nestor Tobias okwa koleke kutya olugodhi ndoka italu kalako we pokati ka Ambunda na Quigg. Onkene ngashingeyi oya tegelela ashike Ambunda opo aaluke keehamo ndyoka, yo ya tale ngele opena yamwe mboka taye ke mu pa ompito opo  aka kondje nayo monakuyiwa.  “Ondjokonona yomalugodhi yAmbunda oyi iwetikile onkene okathimbo owala okafupi taka pitipo omanga nguka inaa mona ishewe ompito oku ka kondja nomumbokisi gulwe,” osho Tobias a popi  nomukumo.

Tobias okwa li woo a ekelehi omapopyo kutya oha etamo aadhengingonyo ya nathangwa mboka ha ye ya okukondjitha aambokisi ye. Omipopyo ndhika odha landula olugodhi lwali pokati ka Walter Kautondokwa na Brian Mwando omu Zimbabwe ngoka a li a dhengwa ongonyo yimwe nopevi medhingoloko lyotango lyolugodhi lwawo lwomadhingoloko 10.

Tobias okwa ti Kautondokwa omumbokisi eendelela na oha dhenge oongonyo dheendelela na ota vulu shili okuhulithapo olugodhi mbala mbala ngele okwa mono ompito. Okwa gandja oshiholelwa sha Mike Tyson a ti nguka omumbokisi gwopaithano ngoka a li ha vulu okudhengamo aakondjithi ye meni ashike lyominute omishona petameko lyuudhano ndele shika itashi ti kutya nakudhengwa omukondjithi gwa nathangwa. Tobias okwa popile ehogololo lye oku kongela aambokisi ye aadhengingonyi haa yo naanaa  okuza kiilongo ngaashi South Africa, Zimbabwe, Zambia, Ghana, Tanzania na Uganda.

Sho a pulwa kombinga yoshinima shika omuwiliki guudhano wombokisa moNamibia , Kelly Nghixulifwa okwa ti nonando oye na omaipulo koshinima shika , opena wo ombinga yimwe kwaashika. “Oshinima iinima ya kwatathana yomaludhi ga yooloka . Eeno otuna omaipulo kombinga yaakondjithi yaa li pamuthika gwokolela, ndele osha pumbwa okuuvikako kutya ondjokonona yaambokisi mboka oya li ya nyolwa petameko lyomaudhano gawo paithano omanga yamwe ngashingeyi  ya sindana momalugodhi gawo gahugunina. 

“Kombinga onkwawo otuna wo okutala kutya oshinima elalakano okuhumitha komeho uudhano wombokisa moshilongo, sho aadhengingonyo mbaka taya pewa ompito okukondjitha aambokisi yalwe omalupita opo mbaka ya gongele uunongo nontseyo yokudhenga oongonyo,”

LEAVE A REPLY

Please enter your comment!
Please enter your name here