FaceBook ina i longifwa oku teya

0
168

Omalupale okomalungula ile opa internet ngaashi o twitter noFacebook, okwa shivika nawa onga omukalo mupe nowa endelela omo ovanhu hava kwatafana mokulikundaneka oinima yonhumba noyongadi, noshinenenima osho okuandjakaneka ouyelele meendelelo.

Oshiningwanima sha ningwa koWindhoek otashi dulu okuudika efimbo olo tashi ningwa kovanhu vefike ile vedule peemiliona omulongo mounyuni aushe. Eshi omolwa ointernet pamwe nomalopale okomalungula ngaashi Facebook na twitter navakwao va hapu.

MoNamibia  omwa fimanekwa unene ovo twa dja nokutumbula. 

Pakutala nee, oinima ei ota i longifwa shiheli mondjila. Natu yandje oshiholelwa shitalala eshi opo ashike sha ningwa onghelainya omo omukainhu womongudu yaavo have li ufana ounona vekondjelomanguluka a dipawa pefimbo loikolokosha pokati kavo nopolifi.

Mefimbo ashike lominute 30, loo efano lanakufya ou nedina laye oli li nale kofacebook. Dilaadila kutya omukainhu ou oku na ovakwapata ashike pefimbo olo ina va shivifilwa natango.

Litula nee mefano eli ngeno oove ina ile mumwaina wa nakufya ou. Nghee wa ile kofacebook efano ile edina lokaana koye ile la mumwanyoko li li kofacebook taku tiwa okwa fya -opo ngaho to shi udu oshikando shotete. 

Omaliudo oyo mbela otaa kala  afa peni? Nghee twa kala, ovanhu otuna omukalo oo hatu yandje onghundana yoluhodi, kovapambele voonakufya vetu. Natu shuneni komufyuululwakalo ou, nokomukalo ou wopanhu. Natu filafaneni oshisho. 

Vamwe shiimba otava ti oikundaneki nayo hai ningi ngaho, nayo ohai nyanyangida omafano nomadina oonakufya omanga ovapambele ina va shififilwa. Eheno ope na shili oikundaneki oyo hai ningi ngaho, ndele nayo ita i popilwa -osha puka.

Mofikola youtoolinghundana omuna oshilongwa shedina Media Laws and Ethics, hano omo ovo va hala oku kaninga ovatoolinghundana hava longwa nokudeulilwa eeveta neenghedi dopautoolinghundana, omo mwa kwatelwa ouyelele kutya onaini oshikundaneki tashi dulu oku nyayangida edina ile efano lanakufya, nomafano oludi lilipi todulu okunyanyangida. Oinima aishe ei oya deulilwa ovatoolinghundana, na osha puka ngeenge hatu nyono eeveta nomaufo eifano letu. 

Ashike oshiwana nasho oshina nee ovo veli ninga ovatoolinghundana ovo va kutwa ashike mbela ku facebook na Twitter. 

Ohatu dimbuluka efano lanakufya Tuyakula Nandjato olo nalo la li li li komalupale aa avali. Oshili omunhu a tetwa omutwe, ndele oto nyanyangida efano linyanyalifa ngaho. Eshi shi udifa nai unene osheshi oo a li ta fekelwa, kutya oye a tula ko efano olo kofacebook, omupolifi. Omunhu oo e li neekelelwa oveta nelandulafano oye vali tei teya po. 

Hano onga ovakwashiwana, otuneni oshinakuwanifa okukwatela po ombili nengungumano, okuudila oluhodi pamwe navakwetu, nokufilafana oshisho. Ovafi ngeno okwa li hava aluka, kapena nande oumwe taka kala a hala efano lolutu laye lihena omwenyo li li kofacebook.

Ngee owa enda poshiponga, teelela kashona, ino fikila wa tula omafano oshiponga kofacebook. Ngee owa uda ngadi ile nhumba a xulifa, teelela fiyo efimbo olo ovakwanedimo va shivifilwa opo u shange “Tulumukwa nombili” ile RIP -okatya oko tuhole, komapandja ovanhu okofacebook. Efyo oshinima shii, nohashi ehameke oonakufiwa po -unene ovapambele voonakufya, onghene natu longifeni omalupale okomalungula oku tunga oshiwana, ndele haku teya po eemwenyo davakwetu.

Natu longifeni omalupale okomalungula noukeka. 

LEAVE A REPLY

Please enter your comment!
Please enter your name here