Mannetti okwi ilongekidha okutungulula ospana yoBrave Warriors

0
181

Komutoolinkundana

WINDHOEK – Opena omathaneko okutungulula ospana yaakuluntu yetanga lyokoompadhi ya Namibia. Ospana yo Brave Warriors ompe ndjika oya tegelelwa oku ka dhana nospana yopashigwana ya Swaziland momasiku 10 Sepetemba nuumvo mokapale ka Sam Nujoma moVenduka. Uudhano mbuka owa tegelelwa oku tamekitha epandja epe lyospana yopashigwana mewiliko lyomudheuli gwayo, Ricardo Mannetti.

Mannetti okwa pewa oshinakugwanithwa okutungulula ospana yopashigwana konima sho ndjika ya li ya ndopa okupita edhingoloko lyotango oku  ka dhana muudhano womanyakwa gaAfrica methigathano hali ithanwa AFCON lyomumvo 2015.

Opo ospana ndjoka Mannetti a tegelela okutulakumwe yi ilonge okudhana pamwe, Olutu lwokuwilika uudhano wEtanga lyokoompadhi NFA olwa longekidha omathigathano gopambili. Omaudhano ngaka opamwe nomaidheulo ogendji, aadhani mospana yopashigwana oya tegelelwa oku ilongathana mokudhana pamwe sho taya tameke olweendo olupe. Ospana ndjika oya li ya tseyithwa Omaandaha oshiwike shika. 

Amushanga Ndjayi gwoNFA , Barry Rukoro, okwa ti ospana yopashigwana oyi na okulundulula etumo lyayo muuyuni wetanga lyokoompadhi nelunduluko ndika oli na oku kala neyambidhidho tali zi koombinga adhihe.

“Otatu tameke epandja epe nondjila ompe moka aadhani yospana ndjika yena okukala wo haya dhana aluhe moospana ndhoka yo haya dhanene omwedhi kehe, kutya oomboka yomoliha yaNamibia nenge mooliha dhilwe muumbugantu wAfrica oshowo mooliha dhopoondondo dha yooloka moSouth Africa. 

Rukoro okwa ti ospana ya Namibia itayi ka ulika ashike aadhani molwashoka ashike mbaka anuwa haya dhana pondje ndele otayi ka ulika aadhani mboka  haya dhana konyala  oshiwike  kehe moospana dhawo. Otwa pumbwa okulundulula okudhiladhila kwetu oshoka ngashingeyi otuna ethimbo lya gwana okutula miilonga ethaneko lyetu epe. Ngashingeyi otwa zamo mokuka dhana methigathano lyo 2015 AFCON,” Rukoro a ulike.

 “Otatu tala kaadhani mboka ya li mongundu yaamboka ya li ye kiidheulila ko Ghana, oshowo omudhani kehe ngoka ewetike e li nawa nota vulu oku gwedha ko kongushu  yospana ndjika opo tayi tungulululwa.”

Okwa ti  osha simana opo aadhani aape ya ye mumwe naamboka aakulu opo mbaka ya igilile okudhana nawa pamwe naamboka ya kalamo nale. 

Brave Warriors okwa tegelelwa aka dhane nawa muudhano mboka tawu mu pe ompito opo a kuthombinga momaudhano gOlympika taga kakalako omumvo 2016. Nuudhano mbuka otau kala wo ongo eilongekidho lyospana ndjika.

LEAVE A REPLY

Please enter your comment!
Please enter your name here