Mzee okwa za moshiyata shapumba

0
238

OHALUSHU – Aakwanezimo lya nakusa Simon Mzee Kaukungwa oya ti ependafule lyiita yemanguluko olya li nuukwatya uuwanawa wo owapumba, mboka wa kwatelamo eishonopeko, uuwiliki oshowo okwaana uumbanda washa.

Kaukungwa, ngoka a li taka gwanitha omimvo 95 omwedhi tuuka okwa manene oondjenda moshipangelo shopaumwene sha Medipark mOngwediva Omaandaha oshiwike shika. Okwa li ena omimvo 94. 

Mzee-(2) Helvi Nanghelo Nambili, omumwayinakadhona  gwanakusa  Kaukungwa okwa ti  omuwayinamati  okwa popi kutya oosa dhe odhina okulililwa pegumbo lye pOhalushu.

 “Ina tya sha kombinga yefumviko lye oshoka ye omuntu gwepangelo , ndyoka tali ka tokola kombinga yaashoka,” osho Nambili a ti. Omugandjimayele gwOmuperesidende mIipambele yiikundaneki nokuli amushanga gwEwawa lyaakuluntu moSwapo ,,Mukwaita Shanyengana, ngoka a li a talelepo oshigumbo sha nakusa Kaukungwa oshiwike shika , okwa ti okuyele unene okupopya kombinga yomalongekidho gefumviko.

Epangelo oli ipyakidhila nomalongekidho gefumviko lyanakusa Lamek Iithete, ongundja yimwe mekondjelomanguluko ndjoka ya hulupo iiwike iyali ya piti.

 “Okuyele oshoka onkundana ndjika opo ashike ya holoka Omaandaha oshiwike shika. Na otwa li ashike twa tseyithile  Omuperesidende Hifikepunye Pohamba ongulohi ndjoka. Otwi ipyakidhila  ngashingeyi nomalongekidho gefumviko lya nakusa Iithete. Ito vulu okutula mumwe iiningwanima mbika iyali ,” osho Shanyengana a fatulula.

 Shanyengana okwa ti nakusa  Kaukungwa omulumentu ena oshili na oha popi shuukilila shoka ye uuvite, na okwa li aluhe iilongekidha  okugandja omayele kwaamboka ye ya kuye. Shanyengana okwa hokolola kutya nakusa , Kaukungwa ngoka a tungitha ombelewa yoSwapo pOhalushu niimaliwa yemwene okwa kala natango omunandjungu mopolitika osigo eso lye. “Okwa li nookuli poshigongi shoSwapo omathimbo opo ashike ga pitipo poHelao Nafidi,’ Shanyengana a hokolola. Kaukungwa okwa valwa momasiku  6 Kotoba  1919 pOhalushu, na okwa li omuvalwa omutitatu gwomaamwayina 12. He okwa li Omusitagongalo ngoka oye a kokolapo egongalo Ohalushu lyongelka yaELCIN. Nakusa Kaukungwa okwa li omukwiita miita Iitiyali yUuyuni, naasho a galuka kiita mbyoka  omumvo 1945 okwa yi kosikola kOngwediva hoka a tsakanene na Andimba Toivo ya Toivo nooyakwawo.

 Okwa kaya koSouth Africa hoka a tsakanene nomukulukadhi gwe gwotango Lena, ngoka ya vala naye aanona yatatu. 

Okwa galukile ko Namibia nokwa longo mopolisi yospeciala ya South Africa moshitopolwa shokukonakona  a li mondoolopa yaUsakos. Omumvo 1958, Kaukungwa pamwe na Ya Toivo, Omukokoli Peresidende Sam Nujoma, Peresidende Pohamba na yalwe oya dhikepo Ovambo People’s Organisation (OPO), ndjoka ya ka lundulukila moSwapo omumvo 1960. 

Kaukungwa okwa kala omimvo odhindji mOwambo, ta hwahwameke noku longekidha iinyangadhalwa yoSwapo.

Aalanduli yoSwapo unene yaalumentu oya li ya longitha omudhingoloko  popepi negumbo lya Kaukungwa ongo ontanda yawo  mpoka ya tungu oondunda.  “Tse otwa li aagundjuka shoka shika tashi ningwa, ndele otwa ka igilila okupenduka mokati kuusiku  tatu tsu uusila nokutelekela aalumentu mboka yakala ha ye ya muka,” omumwayinakadhona Nambili a ti.

 “Mzee okwa li omulumentu omunampango, sho osho she mu simanekitha na okwa li e vule nootate,okwa li wo omulumentu ha tilika,”. Nambili okwa ti aamwayinakadhona oshowo aakadhona aagundjuka  yalwe oya li ya longithwa komumwayinamati okupiyaganeka iigongi yopamuthigululwakalo, sho aakadhona mbaka ya kala ha ya humbata omambapila ga hondjelwa koohema dhawo .

“Mwa hala nenge inaamu hala, oshilongo shika otashi ka manguluka esiku limwe.Kutya nakuzombepo nenge omvula,” ndika olimwe lyomomanyolo gali haga nyolwa komambapila ngoka gali haga humbatwa kaamwayinakadhona ya Mzee piigongi yElelo lyopamuthigululwakalo lyUukwanyama.

Aawiliki yopamuthigululwakalo pethimbo ndyoka okwa li kwa itaalwa kutya oya li ya gama kaakolonyeki.

 Okuhinda omalenga okwa ka adha uupyakadhi sho Kaukungwa a li a piyaganeke oshigongi oshinene shelelo lyOpamuthigululwkalo mOhangwena sho a indile opo aalanduli ye ayehe ya thigepo oshinyanga shiigongi okukondjitha aawiliki mboka.

 Shika osha li tashi sithohoni aawiliki yopahedhi mboka ya ndhindhilike kutya Kaukungwa okwa li a simana eya vule. 

Okwa li ya uvaneke ondjambi yooR50 (N$50) kwaangoka ta kwatitha Kaukungwa.

Konima sho a yakelwako kombinga yoshinima shoka , Kaukungwa okwa kala ethimbo  a holama  nokwa thigipo oshilongo  mekwathelo lya Pohamba  noku ya ko Dar es Salaam, moTanzania, hoka a ka dheulilwa uukwiita.

Kaukungwa okwa kala wo omuwiliki pethimbo lyuundjendi na oye a etapo ethaneko lyokudhikapo Ewawa lyaakuluntu moSwapo nokwa ningi omuwiliki gwewawa ndyoka opamwe nomupevi wiliki gwe nakusa Lamek Iithete.

Mo 1989, okwa galukile kegumbo opamwe nomayovi gaaNamibia ooyakwawo. 

Kaukungwa okwa thigako omukulukadhi gwe  Johanna Kaukungwa, aanona yane naamwayina yahamano.

 “Otwa kanitha omulumentu keena uumbanda, omunandunge oshowo omunankondo. Kutse okwa li oye tate,” Nambili a ti. 

Caption1: 

Omuwiliki gwoSwapo Simon ‘Mzee’ Kaukungwa okwa mana oondjenda. Peresidende Hifikepunye Pohamba naMeme  Penehupifo Pohamba otaya monika pethimbo ya talelepo nakusa Kaukungwa moshipangelo shoMedipark mOngwediva oshiwike shayi. 

Caption 2:

LEAVE A REPLY

Please enter your comment!
Please enter your name here