Omido 14 doilonga yaWalvisbay Corridor Group

0
166

ONGWEDIVA – Walvisbay  Corridor Group ehangano la totwa modula 2000  li  li koshi yoNamport opo li yambidide omahangano omaloli moNamibia, haa umbata  oinima tai di ilo tai ya moshilongo .Ehangano oli na okweeta  pamwe omahangano a yooloka a kundafane oshita oo a hange etwokumwe nghee e na kuyakula. Edi, oda popiwa komunambelewa woWalvisbay Corridor Group, Edward Shivute  meenghundafana noshifo Kundana. Shivute ta holola kutya, Namibia shimwe shoilongo molukadi lwaAfrica shi na a etulilo li li nawa, nosha tunga oitauwa ya uka moilongo moshitukulwa okuxupipika oinano mefikifo lomitwalo moilongo yoSADC.  

Shivute ta weda po kutya, oWalvisbay Corridor Group omukwatakanifi nomahangano omoshitukulwa shaAfrica umbuwanhu (SADC)  afikife diva oyuumbatomwa,  unene moilongo ihe na mikunghulofuta ngaashi DRC, Zambia, Zimabwe , Botswana, Malawi nomoilongo yoo ina omikunghulofuta ngaashi South Afica , Mocambique,Angola na Tanzania, okupitila meendjila dixupi shi n’ombilixa. 

”Namibia okwa tunga po oitauwa ine ya fimana ya dja ketuliloskepa laMbaye ya uka moumbuwanhu waAfrica, Walvisbay -Ndola-Lumbumbashi  Corridor, ya pita moNdola shaZambia ya yuka koLumbumbashi shaDRC.

Trans Kalahari Highway, ya pita moBotswana,Trans Oranje  Corridor ya  pita moAriamsvlei ya uka koSouth Africa. Trans Kunene Corridor ya pita mOshikango ya uka moAngola”. Omanga ondjila yaKatwitwi ya finda moAngola opo tai longwa itulwe pondodo iwa. Shivute osho a lombwela Kundana .

MVA Fund  olimwe lomahangano a kwatelwa meungaungo nomalweendo omaloli, okungonga po oveta yomalweendo  omaloli haa longifa oitauwa yaNamibia. 

Shivute, ota ti, oWalvisBay Corridor omupopili a kwatakanifa  omahangano mahapu haa tumu oilandomwa neeskepa okudja koilongo  ya yooloka meni nopondje yenenedu Africa okuya keenhele da yooloka moshitukulwa shoSADC. Onghee omahangano aeshe haa longele kumwe nokundjadjukununa nawa omikalo dokulonga  nghee taa dulu kuyambula po eliko loshilongo noloshitukulwa.

Oikandjolonga yepangelo ihapu oi n’eembelewa moWindhoek, oWalvisBay Corridor Group oi li moWindhoek poupepi yo nomahangano mahapu noNamport oi na okambelewa kanini moshilandopangelo. 

Molw’ofina ponhele yomapungulilo pOmbaye, epangelo ola ninga omafaneko opo monakwiiwa li tamune mo onhele yokukwatela oyuumbatomwa. Walvisbay Cooridor Group oi na eembelewa moSouth Africa moDRC, moZambia, nomoBrazil okwaandjaneka omauyelele, nokukwata ko omahangano haa tumu oilandifomwa kenenedu Africa. Shivute ta yelifile oshifo Kundana kutya, Walvisbay Corridor Group  ohali longele kumwe nomahangano ngaashi Walvisbay Port Users Association ilile po omahangano mahapu oFreight Forwarding Organization haa didilike oinima tai ya moshilongo pamwe  yo noNCCI , noNmaibia Logistic  Association ina sha nepashukilo loivelo koupitilo weengaba, Roads Authority , oshikondo shemona noshikondo shoipindi noikwafabulika. 

Ehangano ohali ungaunga noundjolowele wovashingi vomaloli neembelewa depangelo nomahangano haa yakula mokweendifa oyuumbatomwa, oli na ovakalelipo keengaba doshilongo okuyakula nondjungu ovashingi vomaloli peengaba nohashi eta oimaliwa ihapu mepangelo li longife oitauwa.

Walvisbay Corridor okwa tula po yo eeprojeka domakwafelo moshilongo nomashikulafano taa ulike nghee ehangano tali yambidida oshilongo noshiwana meyandjo louyelele efimbo keshe.

LEAVE A REPLY

Please enter your comment!
Please enter your name here