Ospana yaNamibia yoRugby kohi yomimvo/19 oyuuka kekopi lyuuyuni

0
188

Komutoolinkundana

WINDHOEK – Ospana yaNamibia yoRugby yaadhani kohi yomimvo-19 oye shi pondola okupita yi ka kuthombinga methigathano lyuudhano worugby wopaigwana woospana dhaagundjuka omumvo tuuka.

Ospana yaagundjuka oya piti oku ka kuthombinga muudhano womanyakwa ngaka konima sho ya dhenge ospana ya Kenya niitsa 52 -17 muudhano uuwanawa pokapale korugby ka Hage Geingob moVenduka Olyomakaya gayi.  Uudhano womanyakwa omagundjuka muudhano worugby muuyuni otawu ka dhanenwa moPortugal omumvo taguya. Uudhano mbuka otawu ka dhanwa koospana dhopaigwana dhili hetatu, dhaadhani yeli kohi yomimvo 20.

 Omwedhi gwayi moNamibia omwali mwa ningilwa uudhano womanyakwa gorugby kohi yomimvo 19 mokwa mwa dhanenwe kiilongo ine, mwaambika omwa kwatelwa Kenya, Tunisia, na Zimbabwe.  Namibia ngoka oye a li ta edhilile uudhano mbuka okwa li a dhengemo ospana ya Tunisia 78-3 okuya kedhingoloko lya hugunina omanga Kenya okwa dhengemo Zimbabwe a zi ashike kelungu niitsa 27-20. Muudhano wa hugunina aadhani yaNamibia oya ulike kutya oya hala okuka kalelapo Africa muudhano mbuka sho ya dhengemo ospana ya Kenya niitsa 52-17.  Ookoola dhotango muudhano mbuka odha li dha tulwamo  okupitila mukapitiya guudhano mbuka Christopher Arries, omanga oonkwawo odha ka tulwamo ku Cameron McNab. Arries okwe shi pondola wo okuthanga etanga okuli pititha mokati koopala dhorugby noshongeyi okwa gwedhako iitsa.

 Pokuya pokafudho konima yedhingoloko lyotango Namibia okwa li komeho niitsa 35 -10 konima sho Divan Rossouw a tulamo ookoola omalweetho agehe geli gatatu mwa kwatelwa ndhoka dha tulwamo ku Milaan van Wyk. Aatalelipo oya tulamo ookoola ndhoka dhe ya pe iitsa ayihe kumwe 10 . Aatulimo yookoola ndhoka oyo  Jeffrey Oluoch na Oscar Nyongesa.

Medhingoloko etiyali kapitiya gwospana ya Namibia, Arries okwa pingenwapo ku Henrique Olivier , konima sho a ehama mongolo, ndele shika ina shi shunitha Namibia monima mokudhana kwe. Aa Namibia oya tsikile noku dhana ngaashi ya li ya dhana medhingoloko lyotango shono ya tulamo ookoola omalupita gatatu, okupitila maadhani, Breedt Hans Jakob, Divan Rossouw na Johannes Retief.  Wildre Smith okwa thangelemo omatanga agehe konima sho ngaka ga li ga tulwa pevi kaadhani ya popiwa metetekelo. Nando aadhani ya Kenya ya li  konima ngaaka, inaya teka omukumo oya tsikile noku dhana nokuuka pehulilo omudhani gwokomeho, Nelson Sangura okwa piti nokutula etanga pevi kokoola ya Namibia lyo etanga ndyoka tali thangelwamo kuMarlin Akoolo naashika osha eta opo oospana ndhika dhi kale dhina iitsa 52-17.

 Omudheuli gwa Namibia, Roger Thompson, okwa ti ospana ye oya ulike kutya otayi vulu okudhana nawa, nonando okwa ti okuuvite nayi oshoka mbaka konyala oyaale ya kanithe okudhana nawa kwawo konima sho kapitiya gwawo ngoka ena enwethemo a li  a zimo mokapale.

“Otwa tamekele nawa ndele konima sho Chris a zimo mokapale, otwa kanitha okudhana nawa kwetu. Onda pandula sho twa piti okuya kedhingoloko lya hugunina. Thompson okwi inekela kutya Arries ota ka adhika aaluka opo a vule a ka dhane methigathano lyuuyuni koPutu.

“Omudheuli okwa longekidha ospana nawa na onda nyanyukwa sho twa pita okuya kedhingoloko lyahugunina , shoka tuna okuninga osho owala oku idheula twa manamo omolwuudhano koPutu,’ Arries a ti. Ospana ya Zimbabwe oya dhengemo ndjoka ya Tunisia 52-21 mokukondjela ehala etitatu. 

LEAVE A REPLY

Please enter your comment!
Please enter your name here