Ya laleke omudiakoni gwawo

0
159

KuMaria Namupala

OMULONDO – Ngaashi shili omukalondjigilile Elelongerki lyaELCIN olya li lya ulike omudiakoni Maria Nakanyala opo a ka longele kegongalo lyokOmuhongo moshimpungu natango tuu shuudiakoni.

Meme Maria Nakanyala okwa kala ta longo oshilonga shika megongalo Omulondo moshikandjohogololo Onayena, mono a kala uule woomvula omulongo. Mosoondaha ya ziko  egongalo Omulondo olyali lya longekidha esiku lyowina, opo li ye li laleke Omudiakoni gwawo omukulu nombili.

Aakwanegongalo oyali ya holoka okuya ya laleke meme gwawo. Omusita gwegongalo ndika no kuli wo Omutonateli gOshitayingerki shaMandongo, Selma Kagola okwali a popitha egongalo noku laleka Omudiakoni ngaashi ha shi ningwa aluhe komagongalo gamwe.

“Oshali oshiwanawa okulonga pamwe na meme Maria, oshoka oye gumwe ngono nda mona maadiakoni ha longo nomukumo, kena okakololo keeheshi megongalo lyetu oshoka oha kwatha noha yambidhidha ayehe mboka taya pumbwa ekwatho, oshowo mboka yeli muuwehame,” Kagola ta ti ngaaka.

Aakwathidiakoni yomegongalo Omulondo nayo oyali ya mono ompito opo ya laleke omuyakuli gwawo. Oyali ye mu imbile oondjimbo noku hokolola okatewo hono ka leshwa noku fatululwa nawa, okatewo okali ta ka tanga omudiakoni Maria Nakanyala nkene a kala ta longo iilonga ye nonkene a taakana omasilu nomilondo oku fala evangeli noku ya kula oshigwana shaKalunga.

Niitya yemwene Omudiakoni okwa ti okwa nyanyukwa no ta pandula Kalunga sho a kala ethimbo ele ta longo oshilongayakulo she shuudiakoni ashike ina tsakaneka omaipumomumwe ogendji, ta holola kutya kapuna shilonga kaashina omashongo ashike ye omashongo gamwe okwe ga yanda noku ga taaguluka nawa.

“Onda nyanyukwa  sho aaholike mwa lalekendje nombili, otandi mu indile opo mu tule ndje momagalikano , tandi indile Kalunga a pendje oonkondo opo ndi ka gandje etumwalaka lyombili kaantu mbeyaka yeli kOmuhongo ngame tandi kala noku ya yakula ngaashi tashi vulika,” ta ti ngaa.

Aakwanegongalo Omulondo oyali ya halele Omudiakoni Maria uukolele,ombili, oonkondo nomukumo okulonga oshilonga she shuudiakoni ye e shi gwanithepo ngaashi eshi inekelelwa komushiti. Egongalo olya pandula Omudiakoni nguka oshoka ye iha tonyala. Okwali a pewa omagano kaakwanegongalo oshoka oyo ye wete kutya okwa longa oshilonga sha simana megongalo muka na ina pumbwa aye iikaha yowala.

Osoondaha ndjoka omusita gwegongalo ndika Selma Kagola okwali wo a popitha aanasikola naalongi mbono yali yeli mefudho. Okwali eya kumike ya shune koosikola dhawo nombili oku ka longa nokwiilonga nuudhiginini. Okwa kumike aanasikola ya kale noku simaneka aalongi oshowo aakuluntu, opo ya vule ya mone elago nomwenyo omule kombanda yevi oshowo omwenyo nelago lyaaluhe lyaana ehulilo.

LEAVE A REPLY

Please enter your comment!
Please enter your name here