Aanasikola 23 moshiponga shohauto

0
225

Komutoolinkundana

ONGWEDIVA – Aanasikola yeli 23 yokosikola Oshipeto Combined moshitopolwa shaMusati oya yi moshiponga sho omuhingi gwoshihauto moka ya li a nyengwa oku pangela oshienditho, shoka sha eta opo shize ko kopate nokuishata po.

Omahokololo oga ti utya omuhingi nguka gwedhina Timoteus Eliaser gwomimvo 25 ka kwali ena ombapila yokuhinga na okwali a londeka shapitilila.

Okwa hokololwa nee kutya uunona mbuka womondondo ontimulongo, okwali wa adhika tawu tutwa wuuka ke ilongo lyomefudho ndyoka lyali kosekundosikola yopombanda yaNesi mUukolonkadhi.

Omauyelele ngoka gagongelwa kopolisi oga ulike aniwa kutya uunona 4 womwaamboka okwali wa ehamekwa noonkondo eta wu taambelwa moshipangelo shaTsandi moka inawu kwatwa mo etawu tuminwa meendelelo koshipangelo shepangelo shoka oshinenene monooli ayihe koonono kOshakati.

Pamahokololo nee gookatale nawa aniwa omuhingi nguka okwali a lombwelwa komukuluntusikola kutya uunona mbuka newu tute iikando oyindji kehe oshikando uunona wuli omulongo noondjato dhawo.

Ashike kemanya kuza ontsi, Eliaser dhomukuluntusikola inedhi kutha ko dhina oshilonga onkee okwa tokola opo a mbwange uunona mbuka mumwe wuli omilongo 23 poshikando mumwe niinguma yawo shoka nee sha etitha opo uunona mbuka wu kale moshihauto moka wa thindakana.

Ngashingeyi nduno uupyakadhi owuli mpaka kutya na kuhinga nguka woo naye okwa ehama na okuli woo moshipangelo shepangelo mOshakati moka eli tamono ekwatho lyopauhaku ashike omutoto gwakolekwa tagu ti kutya okuna okuungaungwa naye kohofa konima sho a kalapo nawa.

Oshiponga shika osha holoka nee metitatu lyoshiwike shazi ko mondjila onene yaTsandi naNesi pone yokomatango. 

Na omuhingi okwaza koSaala kUukolonkadhi.

 Omupopiliko gwopolisi mOmusati Lineekela Shikongo okwa koleke kutya oshiponga shika osha holoka moshiwike sha ziko na mboka ya ehamekwa oye li koshipangelo kOshakati ashike omuhingi gwoshihauto shoka kena ombapila yokuhinga.

LEAVE A REPLY

Please enter your comment!
Please enter your name here