Aanuulema naya hokithwe eithano lyuulongi

0
175

Ku Loide Jason 

ONGHA – Kansela gwoshikandjohogololo Omulonga, Erikson Ndawanifa okwa indile aalongisikola opo ya longe nawa nokusimanekitha eithano nomikankalandu dheithano lyuulongi. Opo mokuninga ngaaka ya kumike aalongwa mboka yena uulema nayo ye ki ilongele eithano lyuulongi.

Okwa ti aalongi naya ete esimano nokuli kaleka po meithano lyawo opo eithano ndika li tyapulwe kaantu mboka yena uulema oshowo komuntu kehe moshigwana.

Ndawanifa okwa popi ndhika pethimbo a li  petulomiilonga lyopologalama yElongo  lyAayehe yoshitopolwa shElongo mOhangwena lya ningilwa poseko yopOngha Omaandaha oshiwike shika.

“Oshinakugwanithwa shetu shasimana ongo aalongisikola osho okukoleka omukumo gwaanasikola unene mboka yena uulema noku ya kumika opo yi ilonge nawa. Natu ya ulukileni ohole yagwana yopakuluntu opo mbaka ya longe nawa noku etamo iitalendi mbyoka yena muyo,” osho kansela a kumagidha.

Ndawanifa okwa tsikileko a ti aalongi inaya kala nokatongo pokati kaanona mboka yena uulema, eya dhimbulutha kutya omaulema gaanona mboka  oga yoolokathana , yamwe oya lemana komalutu, yamwe omomadhiladhilo, yamwe ihaya uvuko nawa, nenge yamwe ihaya monoko oshowo yamwe iipa yawo oya yooloka ku yaanona ooyakwawo.

“Aalongi yamwe ohaya yi kosikola nokutokola yaa gwanithepo iinakugwanithwa yawo. Oshinakugwanithwa oshinene shuulongi osho okulongekidhila aalongwa okuuka muukuluntu noshowo okuninga aakwashigwana yena oshinakugwanithwa. Ethimbo kehe lya hepa, otali ningitha opo omulongwa a mone iihuna,” osho a fatulula.

 Ndawanifa okwa dhimbulutha aalongisikola kutya onakuyiwa yaalongwa  ayehe oyi li momake gaalongisikola oshoka esiku limwe mbaka otaya ka pulwa shoka ya longo naanona mboka, na otashi vulika ondjokonona tayi keya pangula nonyanya molwa okwaalonga nawa.

Okwa dhimbulutha wo aakali poshiithanene shika kutya omatungo ogendji goongulu dhosikola oga tungwa gaana iiyakulitho yaanona mboka yena uulema ngaashi uupitilo  waamboka yeli nando okuutemba.

 Frans Shivute a za koshikondo shElongo lyashewa okwa ti aalongwa yena uulema oya taalelwa komashongo ogendji ngaashi oku ekelwahi kaakuluntu nenge kwaamboka taye ya tekula oshowo kaalongisikola.

Oshikwawo omatungo ogendji kagena omahala geli nawa naalongwa yena uulema unene ngaashi mboka haya longitha uutemba oyena uudhigu oku inyenga nemanguluko pomanongelo oshowo pondje yomanongelo. Okwa thaneke opo Uuministeli wElongo  oshowo mboka Wuundjolowele  nomahangano gaashi gopapangelo ga longele kumwe moshinima shika shaanona yena uulema .

LEAVE A REPLY

Please enter your comment!
Please enter your name here