J&P a patulula oshilahite mOndangwa

0
192

KuMaria Namupala

ONDANGWA – Oomwedhi oonshona dha piti ehangano lyoJohny&Penny Group lyali lya patulula oombonge dhoositola dhawo mOndangwa mondjila onene yaShakati, oyali ya uvaneke tapu ka patululwa oshilahite mbala.

Omunangeshefa omunene monooli John Akapandi Endjala okwali a gwanitha po euvaneko lye ndyono lya ningi lyoshili oshiwike shika. Oshilahite shika oshali sha egulula omiyelo dhasho ongula yOmaandaha. 

Oyendji mboka haya talelepo ondoolopa yaNdangwa esiku ndyoka oyali yeya opo ya konge osheelelwa poshilahite mpoka. 

Oshilahite shino oshili ashike popepi nositola ndjoka ya patulukile, ndjoka hayi landitha iikwamambo oshowo iipumbiwa yaanaskola ayihe konyala.  Mehala moka ohamu ningwawo nookopi, otamu monika woo nehala lyokulandithila iikulya. Omukuluntu goshilahite shika tashi ithanwa J&P Top meat, Konrad Diedriks okwa ti oya tameke naaniilonga omilongo mbali mbono oyo taya kwathele manga moshilahite muka, yo ngele ya mono kutya oya pumbwa natango taya gwedhamo. 

Diedriks okwa uvaneke kutya aaniilonga ye oyi ilongekidha ethimbo kehe okukwathela aalandi mehala muka, ta indile aakwashigwana ye ye ya konge omweelelo gwawo, ta ti ina ya sa omukaga.

Aakwashigwana yamwe oyali ya nyanyukwa noonkondo sho ya patululilwa oshilahite shika. Sakeus Sheya okuli omukalimo gomOshitayi, ye mwene okwati oku uvite ombili sho ya patululilwa oshilahite.

 “Otwa kala no ku enda oondjila oonde tatu ka konga osheelelwa ashike ngashingeyi oondjila dhetu odha tetulwa, ote gandja olupandu olunene nolwashewa kewiliko lyoJ&P sho tali tu etele uuwanawa popepi , mbono tse aakwashigwana tuli twa pumbwa,” Sheya ta hokolola nga.

Aaniilonga yomoshilahite moka mboka yali taya yakula aantu esiku lyepatululo oyali taye shi ningi niipala yuudha enyanyu nombili. Ernest-Ndina Nghaamwa ngoka a yambukile koshitopolwa shaHangwena okwati ye okwa pandula sho a mono iilonga mbika tati okwali owala eli megumbo a mwena. Nghaamwa ta gwedhapo woo kutya ehangano ndika otali kandulapo oompito dhokwaahena iilonga noluhepo mokati kaagundjuka.

LEAVE A REPLY

Please enter your comment!
Please enter your name here