Okanona kosikola taka hepekwa koombepo dha nyata

0
234

KuMaria Namupala

ONDANGWA – Omukiintu omugundjuka okuli ota pula oshigwana shi kwathele okanona ke koomvula 11 hoka kena oshinima hashi popi muko nota shi piyaganeke osikola yako.

Olivia Nghifekelwa ota ti okwa lulilwa konkalo yokamwana kokakadhona okasheeli ndjono inaayi hala yi shune kuuwanawa. “Okanona hano okena oshinima hashiya muko, thimbolimwe ota ka popi owala iinima mbyoka  twaa shi sho taya ti ko ethimbolimwe oha ka kala owala ta ka yolo ihe nenge owu ka pule kutya oshike okamwena owala ke ku tala,” Nghifekelwa  ta popi ngaaka.

Maria Mwafusa goomvula 11, okuli mondondo onti-6 posikola yopevi ya Ndapona Shikende, yina ya Maria okwa holola kutya  oshinima shika osha tamekele pehulilo lyomumvo gwayi manga Maria eli mondondo ontitano.

“Oshinima shino osha tameke tashi piyaganeke eilongo lye oshoka olundji shampa eya kegumbo oha lombwele ndje kutya sho eli mongulu yosikola oha kala e wete mongulu mwa luudha, ye oku wete anuwa oondanda dhokoshipelende tadhi ningi ooshona dha fa dhomOmbimbeli,” yina ya Maria ta ti.

Oya li anuwa ya gandja ehokololo komulongi ngono inaa vula ku kwathela manga oshoka tango kali u uvite ko oshinima shika. Nghifekelwa tati mu Febuluali nuumvo oyali ya haluka unene oshoka okanona hano okali ka adhika komainyengo taga tilitha, muusiku okwa li anuka ko kombete nokwa kala ethimbo a fa a kambuka.

“Ongula yesiku lya landula otwa li twa kutha ohauto momutumba opo tu mu fale koshipangelo, Maria okwali ta hokolola kutya okuna oshinima ta shipi molutu lwe sho sha fa tashi mutsu sha honga, omeho ge oga tameke taga tiligana ye anuwa oha kala uuvite oohauto dhomafumviko tadhi lili momakutsi ge ethimbo nethimbo, okwa ka tameke nee oonyala dhe tadhi tende, moondjila nomidhi dhili moonyala odha kala tadhi luudha shampa wa talamo owafa ashike wi italela mokasipili,” ta gwedhapo ngaaka. Nonando ya kala haya yi koshipangelo ethimbo kehe onkalo yokanona haka inayi tya po hwepo, okwa ka tameka hi ihata po owala ye ta popi iipolopolo mbyono ethimbolimwe waa hashi kutya otayi hala kutya ngiini anuwa. Thimbolimwe ngele a pulwa ohati okuwete aantu ye mu lamba, yo taye mu kookolola anuwa taye mu lombwele opo kaa yewe kosikola.

“Otwa lulilwa ngaa ne konkalo ndjono itaayi lunduluka oshoka nenge tuye koshipangelo ndohotola ohe tupe owala oopela ashike ihadhi ningi po ootuu nande elunduluko, otatu kongo ekwatho moshigwana pamwe opuna ngaa ngo ta vulu ku tu kwathela muudhigu mbuka tuna, oshoka ngashingeyi katu shiwe kutya na tu ninge ngiini, ngaashi oshiwike sha ziko sho ndali nde mu fala koshipangelo kOshakati okwali a tilitha aantu oshoka okwa ka kala ta popi newi enene tati” iimaliwa yoye eyi wa longitha moshipangelo nomolweendo otayi hepa” ngwee shampa we mu pula ando e ku lombwele nawa ewi ihali zimowe muye okwe ku tala owala,” Nghifekelwa ta popi ngaaka neyeme.

Otati okwa limbililwa nokwa hatwa pevi koshinima shika oshoka ohashi ningi owala sho ta tameke osikola nenge ta kutha omambo andola aye kosikola sho oshinima otashi tameke, ta ti omwana nguka kosikola okwi ihulileko mu Febuluali. 

LEAVE A REPLY

Please enter your comment!
Please enter your name here