Oomeme yoombasikela mOmbaye

0
184

KuEveline de  Klerk

 

WALVIS BAY – Aakiintu yatatu otaya kondjo okuihupitha yo yene pamwe noofamili dhawo moshilando shaMbaye.

Mbaka yatatu Katrina  Uugwanga, Ritade Shafodino na Wilhelmina Neshungu otaya ti onkalamwenyo oya ninga ondhigu unene tuu kombinga yuuhupilo moshilando shomatuliloskepa, ihe nando ongawo yo oya uka komeho opo ya vule okuhupa pamwe noyana.

Oshinakugwanithwa shawo shesiku kehe osho okulanditha oombasikela kaakwashigwana yomOmbaye opo yi imonene iiyemo yo ya vule okupalutha oyana oshowo oku ya tumina komanongelo.

Uugwanga omunamimvo 41 okuna omunona gwomukadhona, ngoka ti ilongo moInternational University of Management. Omanga Neshungu okuna aanona yane, yaali yomuyo ohaya yi kosikola, ye omunamimvpo 23 Shafodino oha siloshimpwiyu omwanamati gwomimvo mbali.

Aakiintu mbaka yatatu ohaya longele ongeshefa yawo yokulanditha oombasikela okuziilila poombelewa dhakansela gwoshikandjohogololo shaMbaye gwokomikunda. Ohaya longo iilonga yawo mbika  esiku kehe nomathimbo gamwe ohaya longo wo mehuliloshiwike.

 Sho Kundana eya talele po omasiku gaziko, mbaka yatatu oya ti oshinima ekondjo oshoka  omathimbo gamwe ohashi vulika ya kale inaa landitha nando oyo ombasikela yimwe. “Omasiku ngaka ongeshefa otayi ende kashona. Ethimbo limwe ihatu landitha  nando ombasikela yimwe moshiwike,” Uugwanga a fatulula.

Ohaya landitha oombasikela ndhoka haya landa okuza ku BEN Namibia. Ye nguka oombasikela ohedhi mono momwaalu omunene okuza koBritainia, Canada na Australia tse tatu kedhi landa kuye,”  Uugwanga a ti.

BEN Namibia oha gandja oombasikela ndhika  okunkondopeka  iilongayakulo kombinga yomukithi  gwo HIV/AIDS oshowo okuhumithakomeho oshigwana. Ehangano ohali etamo oombasikela oompe naandhoka dha longa nale, niipumbiwa yadho, okuza komahangao omahewa galyo. Ndika ohali opaleke oombasikela ndhoka  nawa okudheula nokugandja iilonga kaakalimo ongo oomakeninga yoombasikela. Mbaka ohaya gandja omayakulo koshigwana moka ya kala. Uugwanga okwa ti oya li haya mono oombasikela ndhoka oshali okuza omumvo 2009. “Ndele ngashingeyi  ohaya landa oombasikela ndhoka okuza kuBEN Namibia. Omathimbo gamwe ohatu futu oodola omayovi ga heyali okuetamo oombasikela, nomwaalu ngoka ogwa kwatelamo ofuto yolweendo,” osho Uugwanga ati.

Kehe gumwe gwaakiintu mbaka oha kwata oodola 1300, iimaliwa mbika mbaka oya ti inayi gwana okuya hupitha noomvalo dhawo oshowo okukaleka yena omahala gokukala.

“Konima omuntu iho hupupo nasha sho wa futu ehala mpoka ho zi, noshowo okugwanithapo oompumbwe dhaanona.Ohatu nu wo omiti ndhoka dha pumbwa tu kale niikulya tayi tungu,” osho Uugwanga a ti.

Uugwanga na Neshungu oya patulula okandingosho kawo okugwedhako kiiyemo yawo.

“Ekwatho ndyoka tatu  pumbwa kali shi andola lyoshimaliwa. Otatu vulu okukwathwa niilongitho yokwoopaleka, omakalanyana, iipumbiwa yoombasikela. Otatu hiya woo oshigwana opo shi ye shi lande uufalata kutse. Oombasikela ndhika odha kola na odho elongitho lyoshimaliwa ewanawa,” osho a ulike.

Aakiintu mbaka otaya vulu okutalelwapo poombelewa dhoshikandjohogololo sha Mbaye yokomikunda popepi noombelewa dha NHE molukanda lwa Kuisebmond.

 

 

LEAVE A REPLY

Please enter your comment!
Please enter your name here