Outapi wa pewa oombelewa dhoshikondo shUukashike

0
163

KuLoide Jason 

ONGWEDIVA – Ominista yOshikondo shUukashike Kookantu nOnkalonawa yAanona oya egulula ombelewa yoshikondo she ompe pOutapi moshitopolwa Omusati oshiwike shayi.

Rosalia Nghidinwa okwa egulula ombelewa ndjoka  hayi ithanwa  Outapi Community Empowerment Centre oshowo oombelewa moka tamu kala hamu longele aanambelewa yOshikondo she moshitopolwa shaMusati.

Ngoloneya gwaMusati, Sophia Shaningwa pethimbo a popitha aaniilonga yUuministeli mbuka okwe ya indile opo ya gandje omayakulo omawanawa kaayakulwa yawo moshitopolwa shoka opo ombelewa ndjika yi kale yimwe hayi yakula nawa moshilongo.

 “Onda tegelela eyakulo lyafaathana tali pewa aantu ayehe nondjungu  oshowo nawa. 

Otandi indile woo aaniilonga ayehe opo ya yande iilonga yaa li nawa nenge yopombambo, oshoka yo oya pumbwa owala okugandja omayakulo gongushu nogomuthika gwopombanda noku keelela opo omayakulo ngoka gaa yonagulwe nando oko sha,” Shaningwa a indile.

Okwa kumike wo aaniilonga opo ya longe nawa mokudhiladhila nawa ndele haku tegelela ashike ya dhimbuluthwe kutya oshike yena okuninga. Okwa indile wo oshigwana opo shi talelepo ombelewa ndjoka okukonga omayakulo puyo pehala lyokukala ashike tashi nyenyeta molupe lwo”smes” miikundaneki.

 Minista Nghidinwa kombinga ye okwa indile aaniilonga mombelewa ye yaakale ashike esiku kehe ya kuutumba moka ndele ya kale wo yena elandulathano lyoku ka talelapo oshigwana momikunda nokushi hwahwameka opo shi kondjithe elongitho lyoonkondo tali ningwa momagumbo. Oye na wo okulonga aakwashigwana opo ya kondjithe omashongo ngaashi ngoka  gelongitho nayi lyiikolitha, okuekelahi uunona noshowo oku wu thiga po waana omakwatho.

Okwa ti osha simana opo aaniilonga ayehe moshitopolwa shehumokomeho lyoshigwana  nenkondopeko lyasho shi hwameke oshigwana opo shi joine omalongekidho geyokomeho lyoshigwana momikunda dhawo ongo oshilyatelo  okutameka oongeshefa ooshona nodhopokati nongeyi otaya tidhapo ondjala noluhepo.

“Enkondopeko lyoshigwana otali vulu okushonopeka okwaathike pamwe pamahupilo nopankalathano moshilongo, oshoka ohaku etapo onkalo yi li nawa opo aanamikunda yeetepo sha okuhwepopeka onkalamwenyo yaantu yawo momikunda dhawo,” osho Nghindinwa a ti. Uule womimvo odhindji aaniilonga yOshikondo shika oya kala haya longele  momagumbo ga yooloka ongo oombelewa dhawo. 

LEAVE A REPLY

Please enter your comment!
Please enter your name here