Ya dhimbulukwa esiku lyomapendafule

0
200

KuMaria Namupala

OLUKONDA – Oshikandjohogololo Olukonda oshali sha dhimbulukwa esiku lyomapendafule ehuliloshiwike lya zako.

Shika oshali sha ningilwa momukunda Okaloko mOlukonda. 

Oshituthi shino oshali sha dhimbulukilwa pegumbo lyOmusamane ngono a li a edhilila omukondjelimanguluko, Eliaser Tuxadeleni pethimbo lyekondjelomanguluko.

Esiku ndino olyali lya tameke nohungi ndjono ya ningwa uusiku wokupendukila Osoondaha.  26-August-Two

Akwashigwana oshowo oshigwana shokomongula oshali sha holoka ongulohi ndjoka, opo yeye ya pulakene kondjokonona yekondjelomanguluko.

Opwa li tapu hokololwa nokuimbwa omahokololo gopethimbo ndiyaka, oshowo oondjimbo ndhono dha kala tadhi imbwa.

Amushangandjayi gongundu yo SWAPO Nangolo Mbumba okwali a popitha oshigwana shaLukonda Osoondaha ndjoka. 

Moshipopiwa she Mbumba okwa li a kumagidha aakwashigwana ya simaneke aakondjelimanguluko mbono ya eta ombili yoshilongo shika, nonande yamwe ya ka lala nale.

Mbumba okwa kumike aantu ya kale yena ekwatathano lya kola “otwa pumbwa okukalekapo ombili yoshilongo shetu, tse tatu kondjitheni onkalo yuukwamuhoko no katongotongo hono ta ka teyapo ombili yoshigwana shetu, otatu pandula Kalunga ngono e tu pa oofule nomapenda ngono gaana uutile nuumbanda, oga kondjela evi ndika no ga pumbwa okusimanekwa ethimbo kehe, oshoka sho tuli moshilongo shina ombili omolwawo sho ya lwa omalugodhi no ya sindana,” Mbumba ta ti.

Okwa indile aavali ya tume aanona kosikola opo ya ka mone elongo,yo ya kale ya huma komeho. 

‘ longeni nuudhiginini no noneitulumo,opo ku kondjithwe onkalo yoluhepo noyo kwaahena iilonga, aakulupe naya silwe oshimpwiyu, yo oomeme mba yeli momategelelo naya kala taya  pewa esiloshimpwiyu lya gwana,” ta tsikileko ngaaka.

Okangundu okashona na Mutaleni gwaMpingana okwali ya mwenyeke oshituthi shika. 

Konyala aakalimo yomoshikandjohogololo Olukonda oyali ya holoka opo ya gandje esimaneko noku dhimbulukwa omapendafule nga ga lwila oshilongo shika. 

Okwali kwa gandjwa ondjokonona yomusamane Jairus Konis Kapugulu ngono ali a edhilila Tuxadeleni konima sho a mangwa.

Esiku ndyoka osheendo oshali sha katalelapo momuti mono mwali ha mu kala mwa gondja aakondjelimanguluko, oshowo okamuthima mpoka yali haya holama. 

Kansela goshikandjohogololo shika okwali a gandja olupandu kaakwashigwana mbono yali ya holoka momwaalu omunene.

LEAVE A REPLY

Please enter your comment!
Please enter your name here