Eumbo lopashiwana la ehena popepi noshiwana

0
200

 

ONGWEDIVA – Namibia oshilongo shepangelo la kanghamekelwa koudemokoli. Omukwashiwana  keshe a wanifa eedula 18 okuna oshinakuwanifwa shokuli shangifa momahoololo omukalo  wotete wekufombinga metoto leeveta doshilongo okuyandja eenghono koilyo yeumbo lopashiwana i ninge omatokolo ponhele yomukwashiwana keshe a pewa oufemba sha pitila momahoololo.

Edi, oda tumbulwa komunambelewa omupopili ko weumbo lopashiwana David Nahogandja eshi a fatulula kutya, oshiwana oshi na omhito yokuudifa ko ovaleli vopopepi nasho pamikalo da yooloka. Ta fatulula kutya, ongudu yovakwashiwana otai  dulu kwiilongekida  okushanga omadilaadilo, ekemo ilo  osheetwa po shiwa nokushi twala kwaau e li popepi nasho a yandje omushangwa opo e u fikife kombelewa yoshikondo sha kumwa keindilo loludi eli. Ovo ve na oyeendifo, otava dulu ku fikifa omukandakemo ngee okokomitee  yonhumba yokangudu komutumba wopashiwana , ilo otau dulu kuyandjwa komunashipundi weumbo pakuyelifa omadilaadilo ovakwashiwana kutya omwa hala oshinima shonhumba sha longwa pamukalo u li ngahelipi.

Oparliamende ya Namibia, oya fikama po momaumbo avali Oshoongalele Shopashiwana oshoyo eumbo etivali lopashiwana ile National Council. Moshoongalele shOpashiwana oho dulu ku popya noshilyo keshe wa hoolola u shi pe  omadilaadilo oye koshikundafanwa meumbo pefimbo opo.  Molwaashi oparlemente yaNamibia oi li ashike koWindhoek, oshiwana otashi dulu kukufa ombinga ngee opakushanga ombilive koshifo shonhumba ilo kombelewa yongadi .Keshe umwe ota dulu kulongifa oudemokoli waye nokutala ngee ovahololwa tava longo tuu mouwa wetoto leeveta. Eekansela moitukulwa ovo ovakalelipo  votete ve li popepi noshiwana , shihe na kutya  okwa dja kongudu yoye ile owongudu  ili li, oshoyo eengolonea. Oshiwana oshi na oufemba wokuva longifa va ete po sha moshiwana. Oshiwana otashi dulu kuyandja omaliudo asho okupitila  kondjuwo tai ifanwa “lobby room”  meumbo lotete lopashiwana omo  omunhu ta yandje omaliudo. Monational Council omu na ookansela va dja koikandjohoololo yoshilongo noshitukulwa keshe osha kalelwa po keekansela mbali. Oshiwana oshi na oufemba wokukundafana neekansela nokudi pa omayele kombinga yeemhumbwe moitukulwa.

Nahogandja okwa lombwela oshifo Kundana kutya, omutumba wopashiwana owa tula po omalandulafano okuya koshiwana okushi fikifila omauyelele. Ovayandji vouyelele ohava kufa ombinga momaulikilo oipindi haa ningwa koitukulwa yoshilongo ya yooloka , nokuyelifa eenhotwaveta. Ope na yoo oukomitee ovo hava tumwa keumbo okwoongela omadilaadilo oshiwana kombinga yeenhotwaveta da pumbwa ekufombinga lasho ngee sha ufwa ,ngaashi eeveta opo da kundafanwa meumbo oveta yomahoololo nonhotwaveta ina sha nefinamango. Oshiwana otashi dulu kupula omishangwa/ eekopi  deeveta da kundafanwa kombelewa yeumbo lopashiwana notashi  kwafa keshe umwe a shiive eshi tashi ningwa meumbo lopashiwana. Omukwashiwana keshe, ota tuwa omukumo a kufe ombinga moilonga yoparlemende nomivelo da yeulukila keshe umwe a yelule ewi laye koilikundwa meumbo.

 Omutumba  wopashiwana wotete waNamibia owa nangekwa muMaalisa 21, 1990, omanga woilyo yoNational Council ya anifwa kupresidente Sam Nujoma muFebuluali 23, 1992.

 

LEAVE A REPLY

Please enter your comment!
Please enter your name here