Frieda Stefanus oye omulongwa dhingi pOntinda

0
290

 

OKAKU – Etitano lyoshiwike sha ziko olyali esiku lyondjokonona posikola Ontinda. 

Osikola ndjika pamwe nelelonongelo oyali ya longekidha oshituthi shopandjokonona opo ya gandje omapapa nomapole kwaamboka ya longa nawa no nuudhiginini moshikako shotango noshitiyali. 

Osikola ndjino oya tameka poshikunino sigo opondondo ontimulongo.

Ontinda oyili moshikandjohogololo Okaku moshitopolwa shaShana.

Gumwe gwomaaunganeki yesiku ndika no kuli omulongi posikola mpaka Ashipala okwati oya li ya tokola nelelo lyosikola ndjika opo ya unganeke esiku lyegandjo lyomapole kwaamboka ya longa nuudhiginini piikako mbyoka iyali.

“Elalakano lyetu opo tu longekidhe esiku ndika lyowina okutsa ashike omukumo mboka ya longa nuudhiginini naamboka taya kondjo nenge mboka ta ya lu ondende ya umbe ya manamo yo ya ka mone iitsa iiwanawa pehulilo,” Ashipala ta ti ngaaka.

Frieda Stefanus ngono eli mondondo yotango posikola mpaka okwali a kangele ayehe melongo, shoo ye a ulikwa onga omunasikoladhingi posikola ayihe. 

Nonande eli mongundu yopetameko shino okwali eshi ulike miilonga ye ayihe yokomumvo, noku ulika eitulomo lye miilonga ye ayihe yosikola. 

Stefanus okwali a pewa ekopi lyomunasikoladhingi oshowo omagano shoo ye a thigapo aalongwa aakwawo mondondo yotango.  

Konyala aanasikola ayehe mboka ya longa nawa piikako mbika ayihe oyali ya pewa omagano mono muna iipumbiwa melongo opo ya vule kwiikwatha, yo ya tse omukumo mboka inaa ya longa nuudhiginini miikako mbika ayihe.

Ndeutapo Aktofel na Indileni Fillemon oyali ya pewa omapapa dhingi momaudhano, opwali woo pwa gandjwa oonzapo kaanaskola mboka haya simaneke aluhe ethimbo posikola oshowo aanaskola aanamikalo mbono haya vulika kaalongi yawo.

Aalongi posikola mpaka esiku ndyoka oyali ya zala omizalo dhawo dhomapito nelalakano lyoku ulikila aanaskola kutya ngele oyi itula melongo nayo otaya ka kala ya zala omaguwo ngaashi aalongi yawo ye ga zala.

Aavali yaanona posikola mpaka oyali ya holoka, yo ya ninge oombangi sho aana yawo taya pewa oonzapo. 

Omukuluntu posikola mpaka Peter Maswahu otati nonande shino oshikando shotango sho osikola yawo tayi gandja omakopi noonzapo kaanaskola mboka ya longa nawa, oshili etumba kuye oshoka oshituthi shika otati osheenda nawa lela kali a tegelela shi kale sha tya shooo.

Oshilyo shelelonongelo posikola mpaka Martha Kalumbu okwa pandula aanaskola ayehe mboka ya longa nawa opo ya tsikile nomukumo, yo ya kale taya ilongo nelalakano.

Okwa tsu woo omukumo mboka inaaya longa nawa ya kambadhale noku itulamo melongo oshoka olyo oshipatululo shonkalamwenyo yomunona kehe. Kalumbu ta indile aavali yi itule melongo lyaanona yawo yo taya kala noku ya sila oshimpwiyu ngele ta yeya kosikola.

Caption (Pic: Overall Leaner Group.jpg): Yamwe yomaalongi ya zala omaguwo gawo 

Caption (Pic: Overall Learners.jpg): Aalongwa mboka ya longa nawa no nuudhiginini moshikako shotango noshitiyali ye na omapapa gawo

 

LEAVE A REPLY

Please enter your comment!
Please enter your name here