Namibia a gandja oomiliona N$11 kehe okukwathela koGaza oshowo kiilongo ya gumwa koEbola

0
296

 

WINDHOEK – Okabinete kaNamibia oka zimine okugandja omagano goodola oomiliona 11 mokukondjitha omukithi gwo Ebola ngoka tagu ehameke miilongo yomUuninginino wAfrica. Oka gandja woo omwaalu gwa faathana  okukwathela pauntu kaantu ya Palestina mokatopolwa kaGaza, mboka ya monithwa iihuna kiiponokela yepangelo lya Israel.

 Etokolo lyokugandja omagano ngaka goodola oomiliona ndhoka olya tseyithwa momushangwa gwa gandjwa kuAmushangatakalele mOshikondo shOmauyelele nOmakwatathano , Mbeuta-Ua-Ndjarakana oshiwike shika.

Egandjo lyomagano ndika lya Namibia okukondjitha uuvu wo ebola muuninginino wAfrica olya landulwa wo ketseyitho lyOmuperesidende Barack Obama gwAmerica lyopaunamiti kiilongo wo mbyoka, sho a ti ota tumuko aakwiita omayovi gatatu opo ya faleko uukiti wopaundjolowele, okudhikapo omahala gomeendelelo gokuyakulila mboka taya ehama oshowo okudheula aaniilonga yuundjolowele. Oshiwike shika Amushanga Ndjayi gwopevi gwIigwana Hangano kombinga Yiipambele yUuntu , Valerie Amos okwa ti oUN oya pumbwa konyala oobiliona dhoodola dha Namibia  (N$11) okukondjitha omukithi gwoEbola. 

Moshiwike shika iilongo itano moka muna Ebola kokutya Guinea, Liberia, Sierra Leone, Nigeria, na Senegal oya koleke kutya iiningwanima  4,985 yo Ebola oya holoka muyo, naantu omayovi 2,461 oya sa komukithi ngoka. 

“Namibia ota gandja oodola oomiliona 11 ongo uukwawo wa nankali  oshowo okuyambidhidha iilongo yokUuninginino wAfrica mbyoka ya gumwa koEbola,’ omushangwa osho gwa fatulula.“Oshikwawo Okabinete okazimine omwaalu wo gwoodola oomiliona 11 dhomakwatho gopantu okuuva uukwawo wanankali naantu ya Palestina moshitopolwa shaGaza mboka ya halakanithwa yo yamwe yaana we omagumbo omolwiiponokela yaIsrael mbyoka ya dhipaga oyendji oshowo ya lemaneke yalwe.,” Ua-Ndjarakana a ulike momushangwa.

Oomiliona 11 ndhoka Namibia a gandja otadhi pitile mehangano lyUundjolowele mUuyuni, WHO okupitila moshiketha shomayakulo goMeendelelo meyakulo lyuundjolowele  muAfrica okungambeka etaandelo lyuuvu womukwayu miilyolongo yUukumwe wAfrica. 

Namibia okwa gandja omagano ngaka a yamukula konkugo ndjoka ya zi ko AU oku indila iilyolongo  oshowo iigwana yUuyuni  opo yi kwathele  pamukalo kehe mokukondjitha omukithi gwoEbola muuninginino wAfrica.Otaku tengenekwa kutya opwa pumbiwa oobiliona hamano oshinkwanu hamano opo etaandelo lyo ebola li mwenekwe. AU kohi yiilonga yokuyambidhidha ekondjitho lyo Ebola ota tumu aaniilonga yuundjolowele naanawino yalwe kuuninginino wAfrica oku ka kondjitha oEbola.

WHO okwa ti iiningwanima yomukithi nguka oshowo omaso geetwa kugo oya pitilila ayihe kumwe mbyoka ya holokele sho omukithi nguka gwa li gwa tukuka palwe menenevi ndika omimvo dha piti unene tuu moDRC.

“Uupyakadhi mbuka wopaundjolowele inawu tsakanekwa nale methimbo lyonena, na katu shiwo kutya omiyalu otadhi ka londa shi thike peni,” osho omunambelewa gwo WHO Bruce Aylward a popi poshigongi shoonkundana.

O UN na yo oyina omaipulo, omutumwa gwayo omundohotola David Nabarro okwa endululwa kiikundaneki a ti“Otuna oku ka longa nawa sha pitilila na otatu keshi longa,”.

Caption (Pic: Ebola.jpg):  

Caption (Pic: Gaza.jpg): Iiponokela yaIsrael mo Gaza, nomoPalestine oya dhipaga aantu oyendji, oshowo oya halakanitha oofamili noku hanagulapo omagumbo nomatungo gayooloka miitoplwa mbyoka nokuninga aanona oyendji oothigwa pohokololo lyIigwana Hangano.

 

LEAVE A REPLY

Please enter your comment!
Please enter your name here