Va lyatwa manga tava kondjele okastoma

1
313

 

ONGWEDIVA – Omushingi umwe wotaxi okwa fya omanga mukwao a teka okwooko nokuulu, eshi va lyatwa kololi, omanga vali tava kondjele omutwaalelwa.

Oshiningwanima eshi osha ningwa Etivali loshivike eshi mopate yakula, lwopomatungo mashunga opo pena oStandard Bank mOshakati.

Otaku hokololwa kutya ovalumenhu ava vavali va shivikila nawa okushinga outaxi pokati kOshakati nOndangwa ova mona omunhu e li kombinga imwe yopate a fa a hala okutauluka opate opo ngeno a lefe okataxi a ye kOndangwa.

Ngaashi naana shi li omukalondjikilile mokati kovashingi voutaxi neebesa, ava vavali, navo ova lotokela okastoma, opo ngeno keshe umwe womuvo eke mu ihakane.

Mupya munene, ava mbela ina va tala kombinga nombinga opo va dule okutauluka opate. Ova lotoka ashike va tala komutwaalelwa, mboli ota ku di ololi yeendongelwa oyo yeva lyata aveshe vavali omhanga ina va fika pokastoma.

Umwe opo a hulifila opo, omhanga mukwao a twalwa koshipangelo sheEpangelo kOshakati, a teka okuulu nokwooko kwokolumosho. Otaku hokololwa kutya onghalo yaye ota i etifa eenghono. 

Omupopiliko wOpolifi mOshana Shisande Thomas Aiyambo okwa koleka oshiningwanima eshi.

Aiyambo ta kunghilile ovashingi veebesa neetaxi opo va tule po omukalo wokukondjela eekastoma, ta ti oshinima eshi ina shi nyika ashike oshiponga kuvo ashike otashi tula yoo moshiponga eemwenyo dovatwaalelwa, noha shi eta yoo opo va kanife omaliko avo.

Ta weda po yoo kutya opena vali vahapu ve na omukalo wokuhelulila ovanhu mopate, ponhele yokukanduka ko kopate, nokuhelulula ovatwaalelwa peenhele daamenwa. 

“Ovatwaalelwa navo nava kale hava anye ngeenge otaxi ya hala okufikama ikuhelulile mopate. Hamunhu a itavele oku helulwa ponhele ina i amenwa shaashi osha nyika oshiponga,” Aiyambo ta ti.

 

1 COMMENT

  1. most tax driver an bus driver, their are not respect the humanity of humanbeing kaah, they jst focusing on the money, brings conflict because of simple things, may the lord be wth them,rest in peace brada man, an I wsh u quickly recover man , u be okay soon, Road Authority check up plz to bring more tax ranks at the north plz an orderly there

LEAVE A REPLY

Please enter your comment!
Please enter your name here