‘Aahingi simanekeni uuntu womuntu’ – Kashihakumwa

0
207

ONGWEDIVA – Omukuluntu gwopolisi yaShana Commishina Ndahangwapo Kashihakumwa ngoka woo gumwe gwomwaamboka ya tumbalekwa kegumbo lyepangelo kOmupresidente gwoshilongo omundohotola Hifikepunye Pohamba oshiwike shaziko okwa indile opo aahingi yomahauto ya simaneke uuntu womuntu ngele tashiya kelongitho lyoondjila.

Kashihakumwa okwa dhenge omuthindo kutya aahingi mboka haya lyata aayendi yokoompadhi niihauto etaa fadhuka po naye shi hulithepo eta ya tameke oku simaneka omuntu ngoka ya lyata noku mu kwathela mpoka taya vulu.

Commishina okwa ti kutya omuntu ngoka ta lyata omuntu omukwawo eta fadhuka po ina kandulapo omukundu ashike okwe gu gwedhela oshoka oonakukanitha omuntu ku walye oya yemata na oyu uvite oluhodhi lwa pitilila.

“ Ashike ngele owa puma omuntu noshihauto shoye alikana kankameka oshihauto shoka ndele totala kutya omuntu gwaantu ngoka wapuma okuli monkalo yili ngiini. Ngele okuli monkalo yili hwepo mufala koshipangelo ngele ito vulu dhengela opolisi meendelelo ngaashi tashi vulika opo wu kwathele,” Kashihakumwa adhenge omuthindo mpoka.

Kashihakumwa okwa yelitha kutya olundji oshiponga shelyato lyomuntu kashishi oshiningila wina, ashike ngele omuhingi ngoka a ninga epuko okwa fadhuka po nena opuna uupu ku tiwe okwa ningila owina.

Okwati nee shika nashi mone ehulilo ndele aahingi mbaka taya itula naanawa moongaku dhaamboka ya kanitha aaholike yawo molwonkalo ya fa mpoka oshoka otashi ehameke komutima noonkondo.

“Aantu yetu inaya hala okudhilaadhila nawa, ohaya dhilaadhila kutya ngele a fadhuka po otashi kemweendela nawa ashike hasho. Ngele owa thikama eto tegelele nokudhengela opolisi nena mpoka otashi kala oshihwepo.

Okwa kunkulile aalongithi yoondjila opo ya simaneka ooveta nomalandulathano ga tulilwapo oondjila ta yelekanitha kutya ngele omuntu owa hinga wa kolwa ndele to lyata omuntu kala wu shi kutya owa taaguluka oveta yondjila na shikalela po ino fadhuka po.

Kakele kekunkililo ndyoka, Kashihakumwa okwati kutya Oshana ngashingeyi oshili pomuthika omwaanawa ngele tashiya piimbuluma ta ti kutya ngashi nuumvo pethimbo lyoTrade Fair opwa lopotwa ashike iiningwanima yili omugoyi omanga omvogali kwali kwa lopotwa yili 13.

Ashike okwa londodha noku endulula kutya mOshana kamuna ehala lyookalyamupombo oshoka aniwa moshiwike sha zako oya kwata po aalumentu yeli yaali sho ya adhika taya landitha iingangamithi.

Omulumentu ngoka ali a kwatwa po tango okwali omukwashigwana gwAngola ngoka kwali a dhika niingangamithi yina ongushu yoondola 68 811 na okwa holoka nale mompangu yaMengestrata yaShakati moshiwike shayi.

Omulumentu omukwawo omuNamibia okwali a kwatwa po wo shinasha niingangamithi yayooloka nokwa holoka won ale mompangu .

LEAVE A REPLY

Please enter your comment!
Please enter your name here