Awilo otashi vulika ta ka dhana ko Thailand

0
245

WINDHOEK – Sha landula oonkambadhala dha ponyo oku mona ompito yokudhana moospana dhopondje yoshilongo, omudhani gwopokati mospana yo Black Africa, Awilo Stephanus ota shi vulika a ka mone ehekeleko moliha yetanga lyokoompadhi paithano moThailanda nenge Thai Professional Football League, ngele omifofotolo ndhoka dhuuvitike odha ningi dhoshili.

Oonzo dhili popepi nomudhani nguka otadhi ti Stephanus okuli moThailand ta ningi oonkambadhala dhoku dhanena ospana yaBangkok Glass Football Club(FC) na otaku tiwa anuwa okwa fuula ospana ndjoka opamwe newiliko lyayo. Ndele nee ngele ospana ndjoka oyina ehalo oku mu kutha ongo omudhani gwayo nena shika otashi vulika ashike okuningwa petameko lyomumvo 2015 oshoka ompito yoku landa aadhani okuza palwe yomumvo guudhano 2014/2015 oya edhilwapo na otayi ka eguluka ashike ishewe muJanuali 2015.

Moliha yopombanda yuudhano wetanga lyokoompadhi ya Thailand ohamu dhana aaNamibia yaali kokutya ,Lazarus Kaimbi (Bangkok Glass FC) nomudhani gwokomeho Tangeni Shipahu (Osotspa Saraburi FC).Ngele Stephanus okupewe euvathano lyiilonga yokuthanga etanga nospana ya Bangkok Glass,ota ka kala omuNamibia omutitatu momimvo ndhika ta dhana etanga lyokoompadhi moliha yokoAsia.

Iiwike yimwe ya pitipo okwa li kwa kundanwa kutya , Stephanus okwa li ha idheula nospana yoko South Africa yoMaritzburg United,nelalakano ando opo a ninge omudhani gwopaithano mospana ndjoka ndele shika ina shi ka ningwa, oshoka ye ina ulikila omudheuli gwospana ndjoka, Steve Khompela uunyakwa we wokudhana. Stephanus okwa tegelelwa okugalukila kegumbo oshiwike shika.

LEAVE A REPLY

Please enter your comment!
Please enter your name here