Edeulo etivali lovayakuli momikunda mOhangwena ola tameka

0
238

ONGWEDIVA – Noneudo epangelo, ola tofa mo ovayakuli voundjolowele 100 tava deulilwa eyandjoyakulo louhaku momikunda. Edeulo tali ningilwa pEenhana Youth Centre, ola hovela Septemba 01, 2014 tali ka xula pexulilo laMaalisa 2015.

Meenghundafana nomunambelewa omukwatakanifi woundjolowele wopetameko moshitukulwa shaHangwena Angolo yaAngolo, okwa yelifila oshifo Kundana kutya, ongudu ei oya weda kwiikwao yovadeulwa 98 vodula ya dja ko va dja meedistrika domoshitukulwa shaHangwena.

Tete, epangelo ola ninga omalolelo oludi eli kOpuwo moshitukulwa Kunene, opo modula 2013 ola twikilwa moitukulwa shaHangwena, Omusati, Kunene, Kavango naZambezi.

Neudo eshikulafano loludi eli, ola andjakana koitukulwa ya wedwa po Oshana, Hardap, Karas, Oshikoto nOtjozondjupa. Omayakulo oludi eli kovadeulwa aveshe moitukulwa aishe okufike pamwe, omwaalu wovadeulwa moitukulwa aishe oufike pamwe nefimbo ledeulo longushu nomufika umwe oli fike pamwe.

Konima yomadeulo, ovakwatelipo voundjolowele momikunda ove na kukwatela po oundjolowele wopetameko aushe koshi yoshikondo shouhaku tava di momaumbo avo momikunda davo tava pashukilwa kovakulunhu veekilinika nokovanambelewa vakula vefiloshisho loundjolwele moitukulwa. Ovo tava pashukile (home base cares) ovayandji veyakulo loundjolowele wopetameko momikunda, nokupukulula oshiwana momikunda nghee shi na kulaamena komikifi domikwayu, okushi xunga, nokuunganeka oinyangadalwa youhaku momikunda. Otava dulu yo kulongifwa keembelewa doikandjolonga ya yooloka mepangelo ngaashi, opolifi, eekansela, eembelewa dounamapya nokomahangano haa ungaunga noipambele youndjolowele, Red Cross, NAPPA, TCE notava dulu yo kulongifwa nopomafimbo etukuko lomikifi didjuu.

Okwa kutwa ovaNamibia va pita ondodo onhimulongo nonhimulongo nonhivali okudja peedula 23 sha uka pombada, ovo hava dulu kupopya Oshiingilisa nokushi shanga .Mokulongela momikunda davo, ove na kukala alushe nehalo nohokwe yokulonga mokati kovanhu vomaludi a yooloka. Ve na kukala ovaongeli vovanhu hava wanifa po oinakuwanifwa aishe ya li hai wanifwa po kovaliyambi momikundadomeedistrika adishe nhatu moshitukulwa shaHangwena Okongo, Eenhana nEngela.

 

 

 

LEAVE A REPLY

Please enter your comment!
Please enter your name here