Enda po nawa Nambili wetu

0
230

ONGWEDIVA – Omukondjeli mangulukoMoses Heita oo a li omukalimo womodoolopa yaLuderitz moshitukulwa shaKaras, okwa xulifila ombadilila meumbo laye li li modoolopa oyo Olomakaya Septemba 13, 2014.

Mokufindikilwa kengafifif linene okudja keembinga neembinga doshilongo, omunamido 52 odalele yaEnghudi muDesemba 25, 1962, moshitukulwa shaHangwena, Moses Nghihangwavali Shingube yaHeita, ota hokololwa a hakukilwa okafimbo kaxupi nokuxulifila meumbo. Epako ola ningilwa pOmufituwanakashole Olomakya yo 20 Septemba 2014 moshitukulwa shaHangwena.

Ovapopi va yooloka ove mu ndjokonona nghee a kala omunambili, omuyakuli waaveshe ehe na nhondo, omunandjungu moilonga yoludi keshe apewa, omuwiliki, omuyakuli nomutekuli muwa nomupotokononi womikundu mepata, moilonga nomoshiwana.

Mokuya moupongekwa muDesemba 25, 1980 eshi a lekela nombili ovakulunhu vaye kutya otaka djoina ekondjelomanguluko laNamibia moAngola, moule weehani hamano okwa deulilwa oukwaita woSWAPO moLubango moAngola nokonima yedeulo okwa kala nokulongela molukadi lwaAngola oule weehani hamano. Molwa oupenda waye okwa deulwa peenhele da yooloka ngaashi mendiki lomadeulo opaungoba moShumbe shaAngola, opo nee 1983-1989 a ka kala omukulunhu mongulu yoitenda yomatuwa moKwanza –Sul. Oinginia ya deulwa moipambele yopaukwaita oule weehani hamano koSoviet Union , oya ulika oupenda, ohokwe, eshiivo nounghulungu monhele keshe ya longa.

Ovapambele, ookaume, ovashiivikile novanailonga pamwe naye ova holola nghee e va fiilaa po efano liwa nokweeta elunduluko liwa ponhele keshe a longa meni loshilongo nomoupongekwa. Eshi a alukila keumbo 1989 oule weemwedi hamano tete, okwa kala omukwateli komesho wongulu yoitenda yomatuwa ovaleli ( Diesel Mechanic at Swapo VIP Motor Vehicle) onga omupangeli woituwa yina omashina haalongifa omahooli odiesela, nokwa ulika oupenda waye peenhele dihapu a longa ngaashi poCDM, koE-Bay poLuderitz, poCoastal Marine Industry ongochief engineer mombautu yaPescanova. Xuuninwa okwa kutwa melelo lodoolopa yaLuderitz kate opexulilo laye moma 13 Septemba 2014.

Heita ou a hombola Josephina Shitokelwa muMaalisa 1989 koKwanza-Sul, ova pewa ounona vatano, oukadona vatatu noumati vavali. Nomutima wa yeuluka uhen’omalimbililo, omufiyekadi Heita okwa pandula eshi Kalunga e mu pele omuhomboli a yuka monghalomwenyo,e mu fiila omalipulo manene nghee taka twikila nonghalomwenyo pehe na Heita. Mokati kovanailonga a longa navo efimbo omwa kwatelwa mayola wotete wodoolopa yaLuderitz, Emilie Amupewa. Poshivilopako opa li ovanambelewa veendodod da yooloka mepangelo mwa kwatelwa kansela woshikandjohoololo shaNdobe ,Mandume Pohamba, ovakomesho mongeleki , vopamufyuululwakalo nongudu inene yovakwashiwana.

Caption; Mose Heita I,2,3,4

Omufiyekadi navamwe vomoludalo laye va fikama pombila yomuholike wavo konima eshi ye a pakwa pomaendo , pOmufitu waNakashole , moshitukulwa shaHangwena Ehuliloshivike la dyako.

LEAVE A REPLY

Please enter your comment!
Please enter your name here