Gazza oye gwotango ta ka pititha oalubuma 10

0
403

WINDHOEK– Omuhikingalo omunene moNamibia Lazarus Shiimi, a tseyika nawa nedhina Gazza, oye ta ka ninga omuhikingalo gwotango moshilongo ta ka pititha oalubuma onti 10 momasiku 11 ga Kotoba omvula ndjika mokapale ketanga lyorugby kaHage Geingob moOlyimpia.

Kakele ashike kepitiho neuliko lyoalubuma yaGazza ndjika tayi ithanwa Ondjila, Gazza ota ka longekidha ishewe nokudhana  oshituthi showina pamwe naaholi yoongalo dhe esiku ndoka tali ka ithanwa (GMP Day), moka Gazza a hiya ishewe omuhikingalo omuNigeria gwedhina Davido ngoka ta ka mwenyeka ehwata lyaatali mboka taya ka holoka koshituthi shika.

Moonkundathana pamwe noshifo Kundana, Gazza okwa ti esiku ndika olyo limwe tali ka kala lyomomatango omanene moka Gazza a hala a ka tsakanene pamwe naayambidhidhi naaholi yoongalo dhe moNamibia ayihe koonono.

“Otashi ka kala enyanyu enene ku ngame okukadhana esiku ndika pamwe naayehe mboka yehole oongalo dhandje,” Gazza tati.

Oalubuma ya Gazza ota yi ka kala yina uungalo 18 moka ta kwathelwa kaahikingalo oyendji unene mboka yopondje yoshilongo ngaashi Uhuru na Dj Buckz. Moalubuma moka omuna ishewe oongalo odhindji ndhoka oombwanawa ngaashi Shuna, Baba Lalaza, Chaka Dimaz, noonkwawo odhindji.

Gazza okwa gwedhapo tati okwali a luku oalubuma ye ndjoka Ondjila omolwa oondjila adhihe ndhoka a enda okuza kepititho lyoalubuma ye yotango.

LEAVE A REPLY

Please enter your comment!
Please enter your name here