Ohonde, omuti wakula moshipangelo

0
228

ONGWEDIVA – Ngeno kapa liovayandjihonde have liyambe kuyandja ohonde alushe konima yoamfiku 56 , ngeno eemwenyo dihapu oda kana. Eta keshe lohonde to yandje, otali xupifa eemwenyo.

“Okangudu kanini ke lile po eepelsenta 0.8 ke lile po omayuvi 16,000 hake liyambe kuyandja ohonde moshilongo ashishe, nomhumbwe yohonde onghee tai twikile moipangelo yoshilongo, onghee ehangano Blood Transfusion Service of Namibia (NamBTS) otali twikile kwoongela ohonde moitukulwa ya yooloka yoshilongo”. Edi, oda tumbulwa komuambelewa wehangano Natangwe Mwafangeyo pefimbo lokwoongela ohonde koitukulwa yokonooli, okudja Septemba 16 -19, 2014. Ovayandjihonde 166 ova yandjela ohonde mosekundofikola yopombada yaNujoma poShikuku moshitukulwa shaMusati, moshipangelo shepangelo shaShakati, moHifikepunye Pohamba Campus mOngwediva oshoyo koAndimba Toivo yaToivo mOluno moshitukulwa shaShana.

Mwafangeyo okwa lombwela oshifo Kundana kutya, odulya ya dja ko ehangano loNamBTS ola ongela eeunit dohonde omayuvi 28,000 ya xupifa eemwenyo dovanaudu ve dule pomayuvi 144 000 moipangelo yoshilongo. Neudo 2014 oNamBTS ota yoongele eeunit dohonde omayuvi 30,000 ya faneka komwedi keshe yoongele eeunit dohonde 2,500.

Pauyelele wehangano loundjolowele mounyuni WHO, keshe efiku ovakainhu 780 ve li momateelelo ohava fi molwa omhumbwe yohonde. Omwaalu u dulife petata lovafi ovo ovokoshitukulwa shoSub-Saharan Africa oko omukainhu 1 mokati kavakwao 38 omuAfrica ha fi molwa omhumbwe yohonde, omanga koitkulwa ikwao younyuni omukainhu ashike umwe mokati 3,700 ha dulu kufya molwa omhumbwe yohonde.

”Ohonde ya yela oya tameka mwoove mwene ou u li shii, oyo omuti waavo tave ya koipangelo ve I pumbwa ngee omunaudu a tuwa, a dja moshiponga shetuwa, ta vele omikifi ngaashi okankera, omalaria, a tandwa ile omukainhu ta mono okaana. Efiku lokuyandja ohonde mounyuni ohali dimbulukiwa alushe Juni 14, pamwe nehangano loundjolowele mounyuni moukumwe noshiwana”. Mwafangeyo ta tumbula. Oshipalanyole shoneudo “ohonde I na oukolele tai xupifa ovamwali “. Ovakainhu ovo unene hava kanifa ohonde pefimbo lokumona ounona ile konima yokupulumuna.

Etata lolitera yohonde keshe tai yandjwa komunhu keshe, ohai konaakonwa manga opo I dule kupewa ou ei pumbwa, onghee omuyandjihonde keshe oye mwene e na kuli fila oshisho paundjolowele. Omunaudu ngee okwa pumbwa ohonde vihapu, nena keshe okashako kohonde ta tulwa oka dja momunhu e li li.

Mwafangeyo ta weda po kutya, konima yokuyandja ohonde omuyandjihonde okwa teelelwa a nwe omeva noikunguluki ihapu, opo ohonde yaye I shune po konima yeevilli 24. Omunhu keshe e na eedula 16 -65 kakele ou e li koshi yeedula 18 oha yadekelwa ofooloma komukulunhu.

Omadina ovayandjohonde ohaa diininwa molwa ouwa wavo efiku tava ka pumbwa ohonde ihava futu sha. Onghee Mwafangeyo okwa kumika ovo inava tameka kuliyamba mokuyandja ohonde nokuxupifa oshiwana, va talele po omandiki okuyandjela ohonde moshilongo, nokoitukulwa yokolundume lwoshilongo otava ka alukila ko moshivike shotete shaDesemba, 2014.

LEAVE A REPLY

Please enter your comment!
Please enter your name here