Omunangeshefa gomOndangwa a pakwa pEheke

0
300

ONDANGWA – Omunangeshefa gomOndangwa ngono ali a hulitha oondjenda dhe omasiku ga ziko sho a li a mbolokotelwa kekuma okwa pakwa mOlyomakaya kengathithi enene okuziilila megongalo lyawo mEheke.

Frans Koleka Ngalagombe okwali a hulitha ombaadhilila sho a dhengwa noku gwilwa kekuma. Oshiningwanima shika oshali sha ningilwa kOnankali moshitipolwa Oshikoto mOndonga, pethimbo sho yali yi ipyakidhila netungo lili pOnankali mpoka. Koleka okwa hulithile owala mpoka pwa ningilwa oshiponga.

Metitano lyaziko engungo lyaantu olyali lya gongala pongerki ya ELCIN pOniipa poshituthidhimbuluto she , noku gandja esimaneko lyahugunina komunangeshefa nguka. Aapopi oyendji oya hokolola Koleka onga ali omuhungimwenyo,omukumagidhi nomuwatakanithi kumwe gwaantu.

He ya Koleka David Ngalagombe okwa ti yo naakwanezimo oya taambako onkundana yili ngaashi yili nonande ka shali oshipu kuyo. “Oshali oshidhigu okuuva onkundana yoludhi ndoka yali ondhigu momakutsi getu, ashike otwa galikana Kalunga etupe oonkondo moshikogo shika shetu gwililepo, tse tatu itsu omukumo opo aluhe tu kale hatu taamba shoka Kalunga te tu ningile, tse inatu kala owala aluhe twa tega ku taamba iinima iiwanawa onkee ka tu nawe shoka tuna ku ningapo oshoka yemwene okwa mono kutya osha gwana ota zimbula onzi ye,” Ngalagombe ta ti ngaaka.

Efumviko lye olyali lya ningwa Olyomakaya ga yi pegongalo lyawo pEheke. Ongundu yaalilasa oyali ya thindikile omuholike gwawo. Gumwe gomaanangeshefa Veiko Haimbondi okwa ti oya kanitha ependa nomugandji gwiilonga ngono ihaa lala kehethimbo ota longo owala. Haimbondi tati ongudhi yawo ndjono yali ya egamena ya teka ashike okwati oyena omukumo.

Koleka okwali ena oongeshefa dho Old Field mini market noombaa mOndangwa nadhimwe dhili komikunda. Okwali woo anuwa ha landitha noku kwathela aakulupe poopenzela. Gumwe ngono ali a popi peha lyaaniilonga Maria Nepembe okwati oyali ya pewa Koleka omagano ku Kalunga oshoka oye omulumentu gumwe ehole iilonga ye i ha tonyala. “Ngele okwe eta ositoka iha tegelele muye mu helule oha londo owala mohauto etamu helula naye, otwa kanitha omunambili nomuleli gwaantu, okwetu ningila uuwanawa owundji mbono itaatu ke wu dhimbwa moonkalamwenyo dhetu,” Nepembe tati ngaa.

Koleka okwa hulitha mepipi lyomimvo omilongontano nambali (52) Okwa thigiko nee he, omukulukadhi gwe Loide Ngalagombe,aamwayina ya heyali (7) nuunona we une (4). Omusita Eino Ekandjo okwa tsu omukumo aakwanezimo ya kale yena oonkondo tadhi zi pombanda, yo ya kale aluhe noku galikana , yo ya tsikile onkalamwenyo ompe yaana Koleka.

Olyomakaya ndjoka aakwanegongalo mongeleka yEheke oyali yena oluhodhi olunene oshoka oya kanitha aakwanegongalo yawo yaali mbono yali ya pakwa esiku ndyoka. Omwali mwa pakwa kuku Alma Mutundu ya Lwaanda ngono ahulitha oondjenda dhe mepipi lyomimvo omilongo heyali nahamano (76).

 

LEAVE A REPLY

Please enter your comment!
Please enter your name here