Opoloyeka yoshikunino ya tamekwa mOmbaye

0
276

WALVIS BAY – Oshikandjohogololo shaWalvisbay mOshilando osha tameke opoloyeka onene yoshikunino poshilando shoka nelalakano okumweneka nokuhulithapo oluhepo oshowo okweetapo oompito dhiilonga unene tuu dhaakalimo mboka taya hupu nuudhigu.

Iilonga yoshikunino mbika otayi longwa mehala lyoohekta omulongo ndyoka lya gandjwa kuMuni gwaMbaye. Ehala ndika otali adhika pondje yoshilando shika konyala oshinano shookilometa 15.

Oshikunino osha tamekwa, sha landula omalolelo gokuninga oshikunino ngoka ga li ga longekidhwa kukansela gwoshikandjohogololo shika, omusamane Hafeni Ndemula , a li ega ningile pombelewa ye okulola ngele shika otashi vulu okulongwa pehala enene li vule ndyoka lili konima yombelewa ye.

 

Romanus Kawana omunambelewa mombelewa yoshikandjohogololo shika okwa ti ompumbwe yokudhikapo oshikunino oya ndhindhilikwa unene sho aantu oyendji yomuyo aakulupe naamboka yena ombuto yo HIV/AIDS ya kala noku konga ekwatho pombelewa mpoka esiku kehe.

“Aantu mbaka oye li mompumbwe yoondya tadhi tungu esiku kehe opo ya vule okunwa omiti dhawo, ihe ombelewa yetu kayina oshimaliwa okuya kwathela okuya pa iikulya. Onkene otwa monopo ondjila yimwe okuya pa iikulya oshowo iilonga noku ya pa ompito yokungeshefa, sho mbaka taya kala haya landitha wo yimwe yomiihape mbyoka taya kunu nokuteya poshikunino shawo shoka.” Osho a fatulula .

 

Okwa ti ookuume yopankalathano otaya longele pamwe nombelewa ya kansela okukwatha pashimaliwa opoloyeka ndjika niilongitho ya pumbiwa. “Pethimbo ndika otwa odheka okulonga iihape ngaashi oomboga dhomaludhi agehe, uunawamundesha, omatama naambika otayi ka kwatha aantu mbaka taya longo moshikunino oshowo okushi kalekapo,” osho a gwedhapo. Konyala aantu omilongo ne otaya ka longa moshikunino shika.

Kakele kopoloyeka yoshikunino ombelelwa ya kansela otayi longo uusiku nomutenya okukonga omikalo dha yooloka okutidhapo onkalo yokwaana iilonga unene ya shoneka aakiintu. Kawana okwa tumbula wo kutya opoloyeka onkwawo ndjoka hayi longwa okuza poombelewa dhawo oondjoka yoombasikela, hadhi pangelwa noshowo hadhi landithilwa mpoka, yo ndjika oyina wo aaniilonga yakiintu.

LEAVE A REPLY

Please enter your comment!
Please enter your name here