Oseko yaDr Abraham Iyambo yeegululwa kOmuperesidende Pohamba

0
258

EENHANA – “Otandi uvaneke tandi ka longa ngaashi tandi vulu okugandja iizemo iiwanawa ngaashi sha li hashi popiwa ku nakusa Omundohotola Abraham Iyambo. Otandi ka kambadhala ngaashi te vulu ndi ilonge nawa nawa nuudhiginini, oshikwawo inandi hala okuuvitha nayi epangelo lyandje ngele onda ndopa,” osho, Salami Eela omulongwa gwongundu onti 11 a uvaneke.

Omulongwa nguka okwa ningi euvaneko lyokwiilonga nawa uusiku nomutenya pethimbo lyoshituthi sheegululo pambelewa lyoseko yalukilwa nakusa Omundohotola Abraham Iyambo oshiwike shaziko moshitopolwa sha Hangwena.

Salami okwa ti okwa nyanyukwa sho epangelo lye ya tungile osikola yoshinanena moshitopolwa shomakuti shoka olundji sha kala sha talika shili konima nomeputuko. Okwa ti okwa nyanyukwa unene oshoka onkalo moka ya li haya lala manga omatungo ngoka ga egululilwa iilonga oshiwike shayi inaa ga tungwa oya li ondhigu ndele ngashingeyi oye yi dhimbwapo, oshoka nena oyena omatungo gokulongelwa omawanawa, omihandjo omiwanawa oshowo oshililo oshiwanawa moka haya lile mo iikulya itoye yo iiwanawa.

Aalongwa yalwe oya li wo yuulike enyanyu lyawo omolwa osikola yawo ndjoka ya tungululwa nokuningwa ompe nombwaanawa yi vule dhilwe moshitopolwa.

Monika Amutenya omulongwa mograde 11 okwa ti ye okwa nyanyukwa oshoka uupe nuuwanawa wosikola ndjika otau ulike kutya ondjodhi yokomumvo 2030 otayi ende nokuninga yoshili. Okwa uvaneke a ti “Ngashingeyi sho tuna osikola ombwanawa moshitopolwa shaHangwena otandi uvaneke tandi ki ilonga nuudhiginini molwashoka onda hala oku kiilonga Omakwatathano nUutoolinkundana ongo eithano lyandje.Otuna okupandula holomende molwiilonga iiwanawa a longo. Ongaagundjuka otandi gandja omayele kwaamboka taya ka taambelwa menongelo ndika moograde 11-12 yiilonge nawa opo ya kaleke edhina lya nakusa Omundohotola Abraham Iyambo pombanda.’

Thomas Ndahafa omulongwa mograde 11 okwa ti , “Otandi ka soshimpwiyu kutya onda mona iitsa yi vule pomilongo 30 mekonakono lyandje lyograde 12 omumvo tuuka, na otandi kumike aalongwa ooyakwetu oshowo, ya ninge unene tuu sho otse aawiliki yomonakuyiwa , mboka tatu mwenya nena nokugongela molwongula.’

Ye omulongwa gwomograde 12, Lamek Abraham okwa pandula eewiliko lyoshilongo sho lya tungu enongelo ndika ewanawa moshitipolwa shika. “ Itandi ka uvitha nayi nando aakuluntu yandje oshowo Omuperesidende gwoshilongo shetu ngoka etu pe omayele opo tu longe nuudhiginini omolwonakuyiwa yetu. Tse otatu tyapula eilongo lyetu niilongwa yetu oshoka ngashingeyi omudhingoloko nonkalo oyoopalela eilongo lyothaathaa okuyelaka nethimbo lya piti sho twa kala hatu lala mootenda.,’

Nathan Dumeni kombinga ye okwa ti , “ Molwashoka otse aakokoli yograde 12 menongelo ndika , Otandi ka longa ndaana ezimbuko opo ndaa sithe epangelo lyandje ohoni miilonga yalyo . Tse aawiliki yomongula onkene otuna okuthigulula uuthiga wa nakusa Omundohotola Abraham Iyambo noku wu kaleka komuntuni,” osho uuvaneke.

Osikola ndjika okwa li hayi ithanwa nale oseko ya Shikunde yili konyala ookiilometa 35 muuzilo wondoolopa yEenhana moshitopolwa Ohangwena. Oya opalekwa nolutungwa noshimaliwa sha zi moshiketha sha Millenium Challenge Account.

Omuperesidende Hifikepunye Pohamba sho eyi egulula okwa kumike ewiliko lyosikola naalongwa opo ya longe opo ya mone iizemo iiwanawa kaakunawe omumvo kehe, ndele haku itsa ashike iizemo mbyoka sha fa andola kwali inaashi tegelelwa.

Oseko ndjika oya lukululwa nota yi ithanwa nena Dr Abraham Iyambo Senior Secondary School.Pohamba okwa kumike wo aalongwa naalongi opo ya soshimpwiyu kutya yo oya longa nuudhiginini oku kala niizemo iiwanawa mOhangwena omumvo kehe. “Omuna okugandja oshiholelwa koosikola dhilwe mOhakfiya oshowo moshilongo ashihe. Nashikale oshinakugwanithwa sheni kutya osikola ndjika otayi gandja iizemo iiwanawa.” Osikola ndjika oya tungwa nelalakano oku kuthapo ompumbwe yomihandjo oshowo oongulu dhokulongela dhuunona waNamibia.

Omuperesidende okwa indile wo oshigwana opo shaa ete opolitika momanongelo ndele omanongelo ga kale ehala lyokulonga omunona omuNamibia.

“Inatu eteni opolitika melongo, ndele natu longe, nokulonga nokulongelela. Ne otamu longo omugundjuka omuNamibia nomapipi gomongula onkene inatu eteni opolitika piiyelo yomanongelo getu,’ Omutse Gwoshilongo gwa kumagidha.

Manga osikola ndjika ya li inaa yi opalekwa aanona oya li haya lala momihandjo dhokulipo odhindji dhomudho dhali molupe lwootenda . Ndele nena oyena omihandjo oshowo omatungo gena iilongitho ayihe yopashinanena. Aalongi nayo oya tungilwa omagumbo omawanawa.

Oshitopolwa shotango shenongelo ndika osha manithwa muFebuluali nuumvo okuza ethimbo ndyoka aalongwa 404 oya taambwelwa moograde 11 no 12 posikola ndjika ompe.Peegululo ndika opwa li wo omumwayina gwa nakusa Iyambo, Colonel Puma Iyambo.

Oshigwana nasho osha lipo oshindji opamwe nOminista yElongo Omundohotola David Namwandi oshowo amushanga takalele moshikondo shoka omusamane Alfred Ilukena.

Caption 1; Omuperesidende Hifikepunye Pohamba konima yoku egulula enongelo lya Dr Abraham Iyambo Senior Secondary pamwe nOminista yElongo , Dr David Namwandi omanga omuwiliki gwElongo mOhangwena , Sanet Steenkamp a talako.

Caption 3; Eela Salami omunasikola po Dr Abraham Iyambo Senior Secondary ta uvaneke ta ka longa nuudhiginini opo a kalekepo uuthiga womundohotola Iyambo.

Caption 4; Monika Amutenya, omulongwa moGrade 11 a nyanyukwa oshoka ondjodhi yokomumvo 2030 otayi ende tayi ningi yoshili pethimbo ndika.

Caption 4; Ndahafa Thomas omulongwa moGrade 11 ngoka a ti ota ka longa opo a pite niitsa yi vule omilong 30 omumvo tuuka mograde 12.

Caption 5; Ramek Abraham okwa pandula epangelo omolwiilonga iiwanawa.

 

LEAVE A REPLY

Please enter your comment!
Please enter your name here