Ovadali ovena mo sha momadipao ovakainhu -Nghaamwa

0
273

OMHEDI – Ngoloneya wOshitukulwa shaHangwena Usko Nghaamwa okwa takela omunwe ovadali ovo hava efa ovana va otekwe meebashu nomoufleta tati navo ove na mosha momadipao taa ningilwa ovakainhu.

Manga a li ta poifa oshiwana kouhamba waUkwanyama kOmhedi Etivali loshivike eshi, Gavana Nghaamwa okwa ti ovadali vahapu ohava tale ounona vavo ve lihombwifa momalukanda, ndele ohava kala ashike va mwena itava ti ko sha.

“Ounona voukadona paife nokuli ovo hava kala tava futile ovamati eehiira moufuleta voo ngee va ka kala inava hala vali ovamati ava tave ke va teta eefingo vafa oikombo yoKrismesa nomudomupe.

“Nokuli oukadona vopaife ovo hava i kOshikango. Tava denge ouselefona tava pula ovamati apa veli ndele tava londo outakisa tava i kovamati. Ashike Epangelo otali pewa eembedi voo ovadali navo veli va tala ko, ihava ti ko sha kounona vavo,” Nghaamwa ta ti.

Nghaamwa ta pe yoo ombedi ovadali omolwa onghedi ii yokutokelwa poundingosho oyo i li mokati kovanyasha.

Ta yelakanifa ounona neembwa odo hadi i kongeleka, da landula oovene vado.

“Ngee owa i pongeleka yaNdobe, oto hange pe na eembwa dihapu, ndee eembwa odo iha di ifanwa ko nande kongeleka komufita. Kape na nande efiku limwe omufita a ingidile mongeleka ngeno opo ovanhu va twaalele eembwa davo kelongeloKalunga di ka tenekwe omake di ka yambwekwe. Ashike eembwa ngee ta di i kongeleka ohadi shikula ko oovene.

“Eshi oshe li fa ashike nounona ava ngee tava i peekamba tava ka popifa ovakulunhu vavo nge tava di kofikola. Okaana eshi take ya pokamba oke ya po keku shikula onga ina ile xe yako,” Nghaamwa ta ti.

Ta ti ovadali nava xulife po omukalo wokutokelwa poundingosho shaashi otava nyono po oshiwana shokomongula.

Ngoloneya okwa pula yoo opo omalelo opamifyuululwakalo a tule po oveta opo ounona voukadona aveshe ovo vaninga omateelelo omanga vanini ve lishangife koovene vomukunda opo ku keelelwaeokuekelashi ouhanona nelikufo lomadimo.

Ta ti ngee oukadona ve li momateelelo ova tameke okulishangifa, otashi kakala shipu opo va shikulwe ngee va monika kutya kave na ounona voo oova li veli momateelelo.

“Ounona nava shangwe opo tu kale nokuvashikula fye tuva pule kutya ovatekulu vetu ove li peni,”Nghaamwa ta ti.

 

LEAVE A REPLY

Please enter your comment!
Please enter your name here