Vahapu va talela po ombelewa yoOmbudsman mOngwediva

0
184

ONGWEDIVA-Omunambelewa omukulunhuwiliki wombelewa yoOmbudsman John Walter, okwa shakeneka omukwatelikomesho womahangano ovashiiviveta opo va tale kutya, ongeehahende moNamibia otadi dulu naanaa kulonga po shike okuvatela oshiwana. Opena edilaadilo kutya oshiwana oshina okweetela omayakulo oshali. Edi, oda yelifwa komunambelewa wondodo yopombada mombelewa yomupongololi woipambele yepangelo Timoty Shangadi.

Meenghundafana noshhifo Kundana, okwa yelifa kutya okuvatela oshiwana nokuyandja omayakulo opaveta nooshali kovanhu vokomikunda otashi kwafa, shaashi okukundafana nohahende oshi n’ondilo nomayakulo oshali okwa pumba.

Oshe li ulika kutya oshiwana osha kala nomhumbwe yomakwafo opaveta nosha twa ovapopili paveta omukumo ovo ve shi lihaluka mokumona ongudu inene yovakwashiwana ya mbobololokela kombelewa yomupongololi woinima yepangelo mOngwediva moshitukulwa shaShana.Eshi osha twa ovashiiviveta omukumo va faneke kuunganekwe omafiku makwao komesho okuyakula oshiwana sha fy’enota okupewa omakwafo opaveta koitukulwa.

Molwomhumbwe yoshimaliwa shofuto yeehahende doshali mepangelo, okwa didilikwa oupyakadi munene woikoya yomateyo eehombo ya kala ya kanghekwa kepangelo eshi la li la tula po ongaba liha yandje mangha ovakalelipo paveta oule wefimbo .Okudja opo oibofa yomateyo oya tana, vamwe ovo va kala va topauka meehombo oule weedula dihapu ova teelela natango oikoya i teke konima youle weedula dihapu. Shangadi okwa weda po kutya, okuhombola ombilixa ndee okuteya okuna ondilo nohaku pula efimbo lile. Epangelo ola didilika omhumbwe inene yovakwashiwana vahapu ve na oikoya ya pumbwa kupotokononwa, vehe na oimaliwa yokufuta ovakalelipo paveta.

Shangadi okwa kumaida oshiwana shin’omikundu shi di lopote diva keembelewa opo kukelelwe omaupyakadi manga kuyele. Ta pula oshiwana sheefe omikalo doukeena ko na sha noinima i n’oshilonga ta ti, omaupyakadi naa lopotwe manga kuyele .

Mokuuda eshivo lowina moradio yelaka lOshiwambo mefiku latetekela, oshiwana osha nyamukula mokuulika kutya oshi na omaupyakadi. Omukwashiwana ina hala ku tongwa kedina meenghundafana noshifo Kundana okwa kumaida vahapu a mona va pumbwa okutolokelwa va tameke ku shiiva efinamango neeveta doshilongo mwa kwatelwa oufemba wavo op ova dule ku pita momaudjuu opaveta. Shangadi okwa yelifa kutya, ombelewa yoOmbudsman otai ka tala eshi tashi ka ningwa kepangelo okukwafela ovanhu vahapu ve na oibofa ihapu inai pwa.

 

 

LEAVE A REPLY

Please enter your comment!
Please enter your name here