Aasindani yoFacebook tounamenda ya tseyika

0
232

ONDANGWA – Coca Cola na Grootfontein Masters oyo aasindani yuudhano waFacebook wetanga lyokoompadhi mboka wali weya pehulilo ehuliloshiwike lyaziko pokapale ka Andimba Toivo ya Toivo mOndangwa.

Osipana ya Coca Cola oya li yeshipondola nokupitila meyulu lyonane okuthika kesindano ndika, sho ya li ya dhengemo Hope Soccer Academy ookoola mbali muyimwe pokapale hoka kali ka udha kafa ofenya.

Shika oshape Coca Cola ompito yotango okusindanapo uudhano mbuka koshitopolwa shaagundjuka noku toolapo ehala lyotango, oshipandi shoo N$ 7000, ekopi noombandi dhoshingoli.

Hope Soccer Academy ndjoka yali tayi ulike uudhano uuwanawa inayi vula we sha ashike oya li yina owala okwiidhidhimikila ehala etiyali moka ya pewa oombandi dhoshisiliveli.

Ehala etitatu olyali lya yakulwapo ku Samcor omanga Namibian Sun eya pehala etine. Grootfontein Masters okwe shi pondola okudhenga Ondangwa Legends koopenendi konima sho ya li yiithigi onola monola mokapale muudhano waakokele. Grootfontein Masters ndjoka yali yakwatelwa komeho komudhani omukulu gwoBrave Warriors Nelson Geingob oya yambulapo ekopi lyaakokele noshipandi shoo N$ 7000, ekopi noombandi dhoshingoli.

Ondangwa Legends oyeya pehala etiyali,tayi landulwa kOshakati Social Club omanga Omaalala ogeya taga etelele okano pehala etine.

Uudhano mbuka owuli tau koko na ohawu nana aantu okuza koombinga noombinga, onkene ka wali wapwa oshikando shotango sho wa dhanenwe mu Aguste,molwo omwaalu omunene gwaakuthi mbinga.

Uudhano mbuka owali wa kwashilipalekwa no N$ 100 000, konima sho w a li wa totelwepo nomayovi gatano omimvo dha piti na owuli haudhanwa omumvo kehe.

 

 

LEAVE A REPLY

Please enter your comment!
Please enter your name here