Esiku lyondhimbo ontokele pOutapi omwedhi nguka

0
211

ONGWEDIVA – Ehangano lyaanuulema womeho moNamibia nenge [ Namibian Federation of the Visually Impaired (NFVI)] nuumvo otali ka dhimbulukwa esiku lyontondje ontokele momasiku 15 ga Kotoba pOutapi moshitopolwa Omusati.

Omukwatakanithi gwo-pashigwana gwaNFVI, Daniel Trum okwa ti omathimbo oga pita sho aanuulema yomeho ya kala noku tongolwa oshowo oku ningililwamo moshigwana. Trum okwa popi ndhika ta ulike nkene aanuulema yomeho ya li ya talikako ongo aadhinwa naantu ashike mboka ya kala ya holekwa moshigwana. Yamwe oya holekwa kaakuluntu yawo opo yaa monike na ka ya li ya pewa oompito dhoku longwa sha nenge okuningilwa omahala gezulonkalo.

“Otwa itaala kutya opo ombepo ndjika nomutalelo nguka gu lunduluke otwa pumbwa eyambidhidho enene tali zi koshigwana. Etumwalaka lyetu nuumvo oondika kutya: Aanuulema yomeho ayehe naya kale yena oompito dhokulongwa oshowo oompito dhomayakulo gokuzulwa,” Trum a indile.

Elalakano lyokudhimbulukwa esiku lyontondje ontokele olyo okukondjela nokuhumithakomeho uuthemba waantu mboka haya longitha ontondje ndjoka oshowo uuthemba wuuthike pamwe komeho gompango nokutyapula omasindano ngoka ga adhika kaantu mboka yena uulema womeho.

Otema yedhimbuluko lyonuumvo oyo ‘Nonando kapena omeho opena omutalelo guuyuni wuna uuthikepamwe muuthemba womuntu nemanguluko lyaayehe’, shoka tashi ulike ompumbwe opo aantu yuuveko no ya simaneke ongushu nuuthemba waantu mboka yena uulema womeho.

Oshikwawo Trum okwa ti mboka ya holekwa naya mangululwe oshowo naya gamenwe koveta ngaashi sha uthwa kekotampango, nokomautho gEuvathano lyuuthemba waamboka yena uulema.

“Aanuulema yomeho oyo yamwe yomaantu ye na omagano giilonga. Onkene na ya pewe ompito opo ya gandje ko sha keputuko lyoshilongo,” Trum a ti.

Trum, okwa ti oshiningwanima shika sha kala noku dhimbulukiwa okuza 1995 ohashi ningwa okupendula euveko noshowo okulonga oshigwana kombinga yontseyo ndjoka aanuulema womeho yena naashoka yo haya vulu okulonga.

Okwa indile aahingi yiihauto, aakayili yoombasikela oshowo aayendi kolupadhi opo ya humithe komeho euveko oshowo esimano nongushu yontondje ontokele moshigwana noku shonopeka ngeyi okwaa tseya sha kombinga yaantu yena uulema womeho.

“Otu li mpaka okutseyithila kehe gumwe ngoka eli omuhingi gwohauto nenge gwombasikela nenge omweendi koompadhi okutseya nawa esimano lyendhindhiliko ndika.Tu kambadhaleni ngaashi tatu vulu okushonopeka okwaana ontseyo kwetu kombinga yaantu haya longitha oombondje oontokele.Ondi shishi kutya okwaa tseya sha okwo omukithi gwiihanena moshilongo shetu,” Trum a ti.

Trum okwa ti omathaneko ga NFVI ogo okunkondopeka aantu yena uulema womeho nawa opo mbaka ya vule okutyapula uuthemba wu thike pamwe oshowo oku kala momwenyo yiithikamena ngaashi ashike aantu ooyakwawo.

Okwa uvaneke kutya NFVI ota tsikile okulonga oshinakugwanithwa oshinene okugandja omadheulo zulo kaantu mboka yena uulema womeho moshilongo. “NFVI ota ka soshimpwiyu kutya aanuulema womeho oya dheulwa nawa , ota gandja omayakulo gokukaleka oshigwana shiitulamo miipambele yaantu yena uulema womeho opo mbaka ya kale ya tseya uuthemba wawo.

Ota dheula wo mboka yena aanuulema yomeho nkene ye na oku yakula aantu yawo mboka.

 

LEAVE A REPLY

Please enter your comment!
Please enter your name here