Namibia okwa pumbwa oodola oomiliona N$20 okwiilongekidhila ekopi lyuuyuni lyo IRB

0
353

WINDHOEK – Opena natango ethimbo lyomumvo gumwe omanga uudhano wekopi lyuuyuni lyoInternational Rugby Board (IRB) lyomumvo 2015 inaa wu tameka mo Engelanda.

Uukumwe wuudhano wo Rugby moNamibia owu na oshinakugwanithwa oshinene okugongela oshimaliwa shoodola oomiliona 20 okulongekidha aadhani ya Namibia shagwana nawa opo yi ilongekidhile uudhano mbuka womanyakwa guuyuni, pahapu dhOmuwiliki guudhano woRugby moNamibia, Sybrand De Beer.

Nando De Beer okwa zimine kutya omutengenekothaneko gwokwiilongekidhila uudhano worugby, ogwa fa omunene noonkondo , okwa ti omwaalu ngoka ogwa pumbiwa nogu li muuwanawa waadhani ya Namibia.

“Ngele otwi itulamo oku ka ninga mo sha muudhano wekopi lyorugby omumvo tuuka nena otwa pumbwa okuninga omalongekidho ngashingeyi.

Olyo ethimbo okuninga omathaneko ga kankamekelwa kwaashoka twa hala oku adha pethimbo lyuudhano omumvo tuuka pehala lyoku nyenyeta kombinga yomutengenekothaneko,’ osho De Beer a ti.

Okwa ti nonando ehangano lye olina eshongo lyoshimaliwa, De Beer okwa itaala kutya ne yambidhidho lyepangelo oshowo lyoshikondo shopaumwene otaya ka sindana okugongela oshimaliwa shomwaalu ngoka shoka sha pumbiwa okutula omathaneko gawo agehe ngaka miilonga.

De Beer, okwa ti ospana yaNamibia yorugby XV, yedhina Welwitschias, ota yi ka kala nomailongekidho omanene ngoka ga kwatelamo omaudhano gopaigwana geli omu-13. Kakele kaangaka ospana ndjika otayi ka talelapo ko Europa uule wiiwike itatu , metalalopo ndika otayi ka dhana noospana dha kola moFrance nomoPortugal.

Omanga omalongekidho galwe oongoka goku ka dhana na Kanada.

Okwa ti ospana yo Welwitschias otashi vulika wo yi ka ithane Ndowishi nenge Zimbabwe opo eye a dhane nayo megumbo moshiwike shotango shomwedhi tuuka.Omaudhano agehe ngoka otaga ka dhanwa pethimbo omaudhano goliha yoRugby muuyuni geli mefudho.

“Omaudhano agehe ngaka otaga kala ga simana omolwa uudhano wekopi lyoRugby muuyuni. Nomolwashoka otaga dhanwa pethimbo lyefudho lyuudhano worugby, shika otashi pe omudheuli gwospana yo rugby, Danie Vermeulen ompito opo a longithe aadhani yomegumbo naamboka yokondje a tale kutya otaya dhana pamwe nawa ngiini.

De Beer okwa ti oye li wo moonkundathana nolutu lwo rugby lwa South Africa opo ngele otashi vulika aadhani ya Namibia ya joine ishewe uudhano worugby mboka hawu kwashilipalekwa kehangano lyoVodacom, mekopi hali ithanwa Vodacom Cup. De Beer okwa itaala kutya uudhano mboka otawu ka pa aadhani ya Namibia ompito okudhana noospana dhopaigwana.

Namibia okwa dhiladhila wo oku ka dhana muudhano wIigwana wo Rugby momumvo 2015 moRomania.

Omanga ospana otayi ka dhana wo naandjoka ya Zimbabwe na Kenya pamathaneko.

 

LEAVE A REPLY

Please enter your comment!
Please enter your name here