Natu tsikileni okukondjitha oHIV/AIDS noKankera

0
258

Pepandja lyotango lyoshifo shika opena ehokololo lyomulumentu gumwe ependa omuNamibia, ependa momeho ga Kundana , oshoka nguka okwa thikama ku yemwene okuhokolola onkalamwenyo ye konima yokumona ombuto yo HIV/AIDS. Omulumentu nguka, omukalimo gwomOmbaye kakele kokuhokolola nkene onkalamwenyo ye ya li ondhigu petameko sho a lombwelwa kutya okuna ombuto ndjoka, okwa gandja wo iitya nomatumbulo taga kumike aaNamibia yalwe opo yiimange kumwe mokupopya oshowo mokukondjitha etaandelo lyombuto ndjika.

Iitya mbyoka a longitha , mokati kayo omuna omatumbulo taga kumike ngaashi kutya okukala nombuto yo HIV itashi ti eso, omuna ondjokonona ya nkene a kala omukwashigwana ena oshilonga moshilongo she nando okuna HIV. Okwa popi wo nkene yalwe mboka ya monika ombuto ndjika taya vulu okutsikila onkalamwenyo yawo nawa, oshowo mboka inaa ya monika ndjika taya longo opo yi igamene yaa kwatwe kuyo.

Ngaka ogo omatumbulo ga pumbwa oku endululwa, unene tuu sho tuna okutseya kutya uuna omuntu ena ombuto yo HIV itashi ti nguka okuuka meso, ishewe shika itashi ti kutya uuvu mbuka itawu vulu okusindika. HIV ota vulu okudhengwa, ongo miita ngele atuheni otwa longeleni kumwe nopamwe okungambeka etaandelo lyombuto ndjika.

Nando opena omukumo nguka, otashi etitha oluhodhi sho moshimwamemefonkundana New Era,oshiwike shika muna ehokololo tali ulike omiyalu omipe kombinga yonkalo yoHIV mokati kaakiintu.Omiyalu ndhika otadhi halutha unene tuu sho tadhi ulike eyo pombanda miiningwanima iipe yaakiintu mboka ya monika ombuto sho ya konakonwa pethimbo lyokutalelapo uupangelo womathulo. Omiyalu odha ulike eyo pombanda okuyeleka nomimvo 2010, 201 noshowo 2012. Omumvo 2013 oshitopolwa sha Shikoto osho shina omwaalu guli pombanda miiningwanima iipe yaakiintu mboka ya monika HIV ayehe kumwe 1 662, osha landulwa koshitopolwa shaKhomas naakiintu aape ye na HIV yeli 1 433 oshitopolwa sha Kavango oshi li pehala etitatu naakiintu 1350 mboka opo ya monika ombuto ndjoka.

Omiyalu dhaamboka yena ombuto yoHIV okuza 2010 sigo 2013 odha tula oshitopolwa sha Khomas pombanda naakiintu 6,152 mboka yena HIV ta ku landula oshitopolwa sha Kavango naakiintu 5,305, Oshikoto noomeme yeli 5,258 , Ohangwena naakiintu yena HIV 4,957, Omusati guna aakiintu 4,462 taya lumbu noHIV, Oshana shina aakiitnu 3,954 omanga Zambezi ena aakiintu 3,539 mboka yena HIV.

Oshina oku uvikako kutya Namibia okwa longa nawa mokukondjitha HIV/AIDS, shika osha ningwa sho oongundu dhaa iyambi, pamwe nOshikondo Shuukalinawa oshowo omahangano gomakwatho gopaigwana ya longele kumwe neitulemo okukondjitha ombuto ndjoka.

Ekondjo lya Namibia okuza tuu omumvo 2011 olya li ndyoka lyo ku kala inaapa lopotwa nando iiningwanima iipe yaantu ya kwatwa kombuto ndjika. Na Namibia okwa longa nawa monkambadhala ndjoka oshoka etaandelo lyombuto olya ngambekelwa meni lyomwaalu gwonomola yimwe nenge momwaalu omushona. Itatu vulu oku adha omuthika gwokungambeka etaandelo lyuuvu mbuka omushona ngele itatu longele kumwe ongoshilongo. Otwa pumbwa okulongela kumwe okupalamena oonkalo ndhoka tadhi fala metaandelo epe lyombuto ndjika.

Kundana, pamwe noshimwayinafo ota ka kala niikonga kombinga yoHIV/AIDS miiwike tayi ya.Otatu ka hokolola noku topola omahokololo gaakiintu naalumentu omapenda mboka taya lumbu nombuto ndjika oshowo gaa iyambi oyendji mboka yi igandja esiku kehe mokukwathela okuhulithapo HIV/AIDS. Otwa tegelela okuuva osheetwapo shoye nkene tuna okuhulithapo HIV/AIDS muuyuni.

 

LEAVE A REPLY

Please enter your comment!
Please enter your name here