Nekongo a talelepo Iihongo yaMvula lwotango

0
323

IIHONGO – Kuyele mu Juni nuumvo aakalimo yomIihongo oyali ya nyanyukwa sho ombinga yimwe yaamoka yali ya tulwa pambelewa yi kale ya gama koshikandjohogololo Onayena. Otaku hokololwa kutya Iihongo oya kala yili moshikandjohogololo Onyaanya nonande pa mu sinda sha thaanekelwa mOnayena.

Okuza esiku ndyoka kansela gwoshikandjohogololo Onayena, Max Nekongo oyali ya hangana na kansela gwoshikandjohogololo Onyaanya, Henock Kankoshi naakwashigwana opo ya ninge oombangi moku gandja Iihongo kOnayena pambelewa

Nekongo okwali a uvaneke mu Juni moka ta ka kala a galukila mbala kIihongo ye a tsakanene naakalimo yomIihongo lwotango. Euvaneko ndika okwa li eli gwanithapo mOlyomakaya ga piti sho a gongala naakwashigwana nokuya moonkundathana nayo ngaaka.

Aakalimo yomIihongo moka Olyomakaya ndjoka oyali ya nyanyukwa noonkondo okutsakanena na kansela gwayo ngono ya kala ya tegelela. Esiku ndyoka kansela Nekongo a talelepo Iihongo oyali ya dhimbulukwa esiku lyomapendafula nande lya pita, Nekongo tati shino okweshi ningi opo shi kale ondjokonona sho posenda yIihongo tapu dhimbulukilwa limwe lyomasiku omanene lwotango mondjokonona.

Moshipopiwa she Kansela Nekongo okwali a indile aakwashigwana ya simaneke omapendafule nonande gamwe ga ka lala. ” na tu kaleni twa hangana meke limwe nomuukumwe tse tu kale onga omuntu namumwayina,otandi indile tu tungeni oshilongo shetu tse tatu kala tuna ombili,” Nekongo ta ti.

Nekongo okwa holola euvonayi lye “otuna oshinima shomahepeko goomeme nuunona momagumbo oshinima shino na shi mone ehulilo, otwa pumbwa okusimaneka oomeme oshoka oyo ye tu eta kombanda yevi,yakwetu omadhipagathano ga londa unene ,tseyeni kutya omadhipagathano hago ekandulopo lyomukundu omuntu ngele ine ku hala mu etha aye noondjila dhe ngoye oto monopo ashike goye,” ta gwedhapo ngaaka.

Kansela okwa indile opo iipango omulongo yi kale noku simanekwa. Okwa indile woo epangelo li talulule oveta, lyo li galulile elongombiimbeli moosikola. “aanona yetu oya pumbwa ku longwa Ombiimbeli okuza poongundu dhopetameko yo ya vule oku yanda iilonga iiwinayi, yo ya kale woo noku simaneka aakuluntu, eputudho olya pumbiwa ku gandjwa petameko, nena elongombiimbeli ngele olya tamekwa moosikola uunona owundji otawu kala wuna etiloKalunga, tse tatu yanda ombepo yomutondi ndjono tayi eta etopoko moshigwana,” ta tsikileko ngaaka.

Kansela Nekongo ta indile kehe ngoka a gwanitha oomvula nokwiishangitha, a kale a ka hogolola mu Novomba oshoka ewi lya kehe gumwe otali tisha, lyo olya yalulwa.

 

LEAVE A REPLY

Please enter your comment!
Please enter your name here