Okankera omukifi hau dulu kukelelwa

0
255

ONGWEDIVA – Nande omukifi wokankera ou li pamikalo dihapu, ohau dulu kukelelwa. Omaludi omukifi wokankera tau mane po oshiwana mounyuni, nomoNamibia omukifi owe tu kufa notau twikile ku tu kufa ovanhu vahapu, ngeenge oshiwana itashi diinine omakonaakono. Edi, oda tumbulwa komukulunhu woshipangelo shopaumwene mOngwediva MEDIPARK omundokotola Tshali Ithete.

Ndokotola Ithete okwa fatulula omaludi eekankera da kwata ovaNamibia vahapu yokoshivelo shoshidalelo, yokomavele, yokoilyo yoidalifo yovalumenhu. Ashike, okankera yokoshipa, yokexuli, yomengwamunino noyomohonde odimwe domaludi okankera hai endelele. Odula ya dja ko, oshipangelo shopaumwene shaMEDIPARK mOngwediva moshitukulwa shaShana pamwe nehangano Cancer Association of Namibia, ova unganeka ekonaakono loshali okukwafela epangelo okukonaakona oshiwana omakonaakono okankera oshali.

Ongudu yovakainhu 400 oya konaakonwna moMEDIPARK moshitukulwa shaShana ofimbo kOnemanya moshitukulwa shaMusati kwa konaakonwa ongudu yovakainhu 390.

Omapekaapeko opaunongononi okwa yelifa kutya, okankera yokoshidalelo oha yeetwa unene kombakiteli “Human Papiloma Virus (HPV)” hai tandavele okupitila momilele ile momakwatafano oipa noipa. Omakonaakono okwa koleka kutya 90% domukifi ou, otau dulu kukelelwa pamukalo womakonaakono oPap smear. Okankera yokomavele oya kwata ovanhu vahapu mounyuni. Luhapu ohai fyuululwa ,ndele ohai dulu kukelelwa nohai dulu kuhakulwa.

Ndokotola Ithete okwa yelifa kutya, mokati kovanhu 467 va monika omukifi wokankera moNamibia odula ya dja ko (2013), omuwoi vomuvo ovalumenhu va monika okankera yokevele, hano ovalumenhu navo ohava dulu kukwatwa kokankera yokevele. Omakonaakono odiva otaa xupifa omunhu a ha kwatwe kokankera. Okankera oninhatu oyokoilyo yoidalifo yovalumenhu hai va kwata unene okudja peedula 50 sha uka komesho, hamoNamibia amuke ndele nomounyuni aushe.

Ovalumenhu ve na ovapambele va kwatwa kokankera yoludi eli, otava tuwa omukumo va ye komakonaakono mangha kuyele nokwaadiinina.

Oshipangelo shopaumwene shaMEDIPARK noneudo osha unganeka ekonaakono etivali loshali lovakainhu tali tetekelwa kosheendo showina tashi tameke poshipangelo mOngwediva Kotoba 18, potundi 06H30 okupashula oshiwana kokankera yokoshidalelo noyokevele.

Otapa ka kala eendokotola dihapu okuninga omayelifilo kombinga yomukifi, ekonaakono loshali lovakainhu Kotoba 19, 2014. Omweenda munene pomhito ya tya ngaha omunyekadi woshilongo meme Penexupifo Pohamba. Novemba 15, efiku le likalekelewa oxungi yovalumenhu notapa ka kala vamwe ovo va monika omukifi wokankera tava hokolola ondjila va enda opo va mone ouhaku. Eshi otashi kwafele eenghendabala depangelo, shaashi ava va monika omadidiliko ohava ukifwa koipangelo oko tava ka mona ouhaku.

Ndokotola Ithete okwa kumika oshiwana shi diinine omakonaakono poipangelo yopopepi moshilongo. Mangha omunhu ina didilikwa kutya okwa kwatwa kokankera, oha kanifa olutu nehalo lokulya poo kape na omukifi wa dididlikwa. Onghee okwa kumaida ovo va ninga oihakanwa va tambule ko omukifivaha kale noumbada nokudiinina omalombwelo oshoyo okutambula ko omukifi opo ouhaku weende nawa.

Caption (Pic: Dr Ithete.jpg): Omukulunhu woshipangelo shopaumwene mOngwediva MEDIPARK omundokotola Tshali Ithete (Efano: Ekulu)

 

LEAVE A REPLY

Please enter your comment!
Please enter your name here