Oku mangululwa kwa Ya Toivo

0
252

Mu Maalitsa 1984 epangelo lya Botha olya ningi epuko enene sho lya tokola okumangulula oshilyo oshitotipo sho Ovamboland People’s Congress, Andimba Herman Toivo Ya Toivo, ngoka a kala eedhililwa kOntuntu ya Robben okuza omumvo 1968, na okwa li endhindhiliko li shiwike muuyuni lya Namibia mokukondjitha nokutsondumbo nekalemo lyaa li pampango lya South Africa moNamibia.

South Africa okwa ningi epuko ndika sho itaale momadhiladhilo ge mwene kutya oSWAPO oya li ya topoka meni lyawo, oya li ya dhiladhila kutya

Hailwa ya Toivo otaka eta etopoko moSWAPO. Andreas Shipanga okwa li a tumwa eke mu tsakaneke mondholongo ya Venduka, opo andola emu itaalithe opo a joine uudhano mboka kwali hawu ithanwa oshigongi shoongundu odhindji.

Ya Toivo sho a mono Shipanga omanga ta zi mondholongo okwe mu pe ashike ombunda ye noku katuka tayi noondjila dhe.

Meni lyomasiku omashona okwa li mondjila okutu joina muundjendi. Konima yokumangulula omuwiliki ngoka a li eshiwike muuyuni okwa thiminike South Africa opo ya kambadhale okwoopaleka epuko lyawo sho ye mu pe uuthemba womasiku omilongo ndatu opo a thigepo oshilongo.

Pamwe nooHailwa Witbooi, Tjongarero, Bessinger na Crispin Matongo,Andimba Toivo ya Toivo oye ya nondhila koLusaka moka twa tsakanene lwotango. Otwa li twa kundathana ethimbo ele tatu popi kombinga yomimvo ndhoka twa kala tatu tungu shoka sha ka ithanwa SWAPO, twa popi nkene omashina getu moka twali tatu ende ga li ga pingathana popepi nOshomeya omumvo 1958 osho wo twa popi kombinga yaashoka shaningwa po okuza tuu nkene Ya Toivo a li a mangululwa.

Emangululo lye olya landulwa wo kemangululo lyoonkwatwa oonkwawo odhindji, naashika osha talikako ongo esindano lyoSWAPO kookuume ketu muuyuni auhe. Ya Toivo okwa li a hogololwa a ninge Amushangandjayi, ehala ndyoka lya li lya thigwa owala ku Jacob Kuhangua sho a thigpo oSWAPO.

Okwa li a ende iilongo oyindji nokutalelapo omahala ogendji okutsakaneka ookuume ketu miilongo yokuuninginino oshowo mbyoka yokuuzilo.

Omumvo gwo 1984 okwa li a kwatele komeho osheendo koshigongi showina shIigwana Hangano okudhimbulukwa omimvo ethele okuza nkene uukoloni wa Ndowishi wa li wa thiminikilwa aaNamibia, okwa li a taambwako nenyanyu pehulilo lyoshigongi shoka. Emanguluko lye olya popiwa noku uvithwa kutya olyo esindano lyoSWAPO noalyantu ya Namibia.

Ngame onda li wo nda ende olundji okuza omumvo 1984, nomimvo mbali dha landulako, tandi gwedhako kekondjo lyopaigwana, mo ku tsakanena nomapangelo ogendji, oshowo okukala piigongi iinene yi na sha na Namibia moParis, okuya moonkundathana nOmupapa John Paul II moVatican, moonkundathana nepangelo lya Italia mo Roma oshowo mOshigongi shAayehe shIigwana Hangano, moka omukalelipo gwa America, Jeanne Kirkpatrick a tsikile nokupopila omulandu gwoshilongo she gwokukundathana nepangelo lyokatongo gwali hagu ithanwa ekwatathano tali tungu oshowo okupopya kombinga yokangundu kiilongo yokUuninginino ke dhina Contact Group.

 

LEAVE A REPLY

Please enter your comment!
Please enter your name here