Omulongwa poNehale a kumike aanaskola ooyakwawo

0
322

ONAYENA – Konima sho aanaskola yondondo onti-10 nondondo onti-12 yali ya tameke omakonakono gawo ga hugunina gokomuvo, oyendji otaya ulike eitulomo ewaanawa nayamwe ina ya hala okulesha yi itulamo.
Jeremia Simeon ngono eli mondondo onti-12, omulongwa posekundeskola ya Nehale okwali a kumike aanaskola ooyakwawo opo ya kutheko oongaku koompadhi ya leshe omambo neitulomo opo ye ke shi pondole iizemo ngele ya piti. Ndhino okwali edhi popi sho a popitha aanaskola yondondo onti-10 posikola Iihongo oshiwike shaziko sho ya tameke omakonakono gawo ga hugunina gokomumvo.

Simeon okwa ti okuwete sha simana manga opo yeli petameko lyekonakono a kumike aalongwa ooyakwawo noku ya tsa omukumo yi ilonge nuudhiginini. “Onda hala opo twiituliimo miilongwa yetu, tse tu ka mone iizemo tayi tu fala kiiputudhilo yopombanda naambono yeli mondondo onti-10 yaye kondondo ya landulako,” Simeon tati ngaaka.

Okwa ti oshasimana onga aanaskola ya kale taya longele kumwe ethimbo lyekonakono, yo taya kala taya pula aalongi uuna kaaya uvite oshilongwa shontumba. “Elongo olyo oshipatululo shonkalamwenyo yomunona kehe, tse otse ehukamugongo lyoshilongo shika onkee ngele itatu ilongo tse tu tseye uuwanawa welongo nena oonkalamwenyo dhetu otadhi kala dha tsima, dho itadhi kala nongushu onkee na tu ilongeni neitulomo,” ta gwedhapo ngaaka.

Simeon tati kwaamboka yali inaaya longa nawa piikako ya piti, naya kambadhale ya longe nuudhiginini pekonakono ndika oshoka olyo osheelo shoku ya egululila ompito yokuya kiiputudhilo yopombanda. Okwa kumagidha mboka taya mana ondondo onti-12 ya kale no ku simaneka omuntu kehe yo ya kale taya yambidhidha aakuluntu miilonga manga ya tegelela iizemo yawo yahugunina.

” Kehe gumwe oho teya shoka wa kuna, ino kala wa tega wu teye omapungu ngoye wa kuna omakunde, sha hala kutya eteyo lyoye na li ze kiilonga yoye mbypoka wa kala to longo momukokomoko gomumvo nguka, otandi mu halele elago meilongo lyeni nondi inekela kutya atuhe otatu ka mona iizemo tayi nyanyudha kehulilo,” Simeon ta popi ndhoka nomukumo.

 

LEAVE A REPLY

Please enter your comment!
Please enter your name here