Oomvula 15 ta mwenya nombuto yoHIV

0
331

WALVIS BAY – “Otashi gandja uuwanawa owindji nenge otashi kala oshiwanawa uuna omuntu wa holola kutya owa thikama peni ngele tashiya kombuto yoHIV/AIDS. Oshoka ito vulu okukondjitha ombuto ndjika ongoye awike,” ngaka omatumbulo gekumiko okuza ku Bernard Kamatoto ngoka a kala nombuto yo HIV uule womimvo 15 sigo oompaka.

Kamatoto okwa popi ndhika sho enako ashike omasiku omashona oku gwanitha omimvo omilongo ntano monkalamwenyo ye omwedhi tuuka. Okwa kumike mboka taya lumbu nombuto yoHIV ya nwe omiti dhawo itaa ya faula, eya kumagidha a ti omiti ndhika odha kutha po oshimaliwa oshindji mondjato yepangelo.

Bernard Kamatoto , omumbokisi nale gwomoshilando sha Mbaye ngoka a monikile ombuto yoHIV omumvo 1999. Okwa ti okuna etompelo okudhimbulukwa noku tyapula onkalamwenyo.

Kamatoto ngoka a lumbu nombutop yo HIV uule womimvo 15 otaka gwanitha omimvo 50 momasiku 25 Novemba nuumvo. Okwa ti etompelo ashike kutya okuna natango omwenyo ye ishewe okuna uukolele noku na ombili nombuto ndjoka , osha gwana oku kumika ayehe mboka yena ombuto ndjika ya tsikile nonkalamwenyo.

Okuza tuu nkene a monikile ombuto ndjoka okwa longitha ethimbo lye okupopitha aantu oshowo oku hungomwenyo oongundu dhaayambidhidhi yaamboka yena ombuto yoHIV.

Kamatoto okwa monika ombuto ndjoka omumvo 1999 manga omugundjuka ta tyapula onkalamwenyo na okwa li mokati kuuwanawa weithano lyuudhengingonyo.

Okwa ti onkundana ndjoka sho eyi pewa kundohotola gwe gwopaumwene oya yonagula onkalamwenyo ye .

Ndele ngashingeyi sho ta ka gwanitha omimvo 50 shika otashi mu kumike na ota kumike yalwe kutya omuntu ina pumbwa okuthigapo uuyuni molwashoka ngoye owuna ombuto yoHIV. “Onkene ngame otandi ka longitha edhimbuluko lyomimvo omilongo 50 dhevalo lyandje oku adha oongundu dhaantu naamboka opo taya itaale shili kutya otaya lumbu nombuto ndjika,” ta ti.

Kamatoto okwa hokolola esiku a lombwelwa iizemo yekonakono lye kundohotola gwopaumwne okupitila mongodhi, a ti onkundana ndjoka oya yonagulapo oondjodhi dhe adhihe dhoku ninga omudhengingonyo paithano.Shika oshe mu undulile mokunwa omalovu okulundulula onkalamwneyo ye.

“Onda tameke nda sinyala nonda geya ethimbo alihe na onda kala handi kondjo olundji nookuume kandje oshowo na meme.

Onda li wo nda dhiladhila okwiidhipaga. Shika osha holoka sho nda kala nduuvite kutya otandi thiminikwa okutseyitha mpoka nda thikama kombinga yombuto yoHIV.”

“Ota dhimbulukwa kutya enyakwa lyombokisa lyuuyuni lya Namibia Harry Simon oye gumwe gwaantu mboka ya li ya tegelela okuuva iizemo ye kutya oya tya ngiini omanga nguka a li ko United Kingdom.”

“Onda kala noku henuka ihe hugunina onda ka lombwela Harry kutya onda monika ombuto yoHIV onkene itandi vulu okutsikila nokudhana ombokisa.

Harry oye omuntu gwotango nda kwatathana naye. Shoka sha kumitha ndje ooshika kutya ye inii yageka ndje molwashoka ndina ombuto , ngaashi kwali tandi dhiladhila. Ndele ye okwa yambidhidha ndje unene pethimbo ndyoka uuna omuntu wuna oHIV aantu iha ye ku tala nawa.

Sigo onena tse ookuume yopothingo lela,” osho Kamatoto a fatulula.

Okwa ti Simon okwe mu landele okakalata kondhila okuya aka hungwomwenyo ko UK oshowo okwe mu futile ehungomwenyo lyoomwedhi hamano mo South Africa omanga inaa galukila kegumbo koNamibia.

Okwa yambidhidha ndje pamwe naye oshowo nookuume yalwe oya kumike ndje opo ndi holoke puuyelele noshowo okutseyithila meme naakwanezimo yopopepi mpoka nda thikama.

Kamatoto okwa ti itashi mu uvitha nando onayi sho iiholola kutya okuna ombuto yoHIV omumvo 2003 moSwakopmund. “Ndika olya li etameko lyoshili lye aluko pamaiyuvo. Esiku ndyoka onda li nda gandja ombili kaakiintu ayehe mboka nda pa oHIV oshowo mboka ya pandje ombuto ndjoka na onda kala nombili noHIV.

Onda pewa ompito ontiyali yonkalamwenyo na otandi pandula epangelo sho lyetu etele omiti dho ARV na olya soshimpwiyu kutya kehe gumwe edhi pumbwa okuna okudhimona pwaana uudhigu.

 

LEAVE A REPLY

Please enter your comment!
Please enter your name here