Yaali ya sile moshikweyo

0
289

ONGWEDIVA –Aalumentu yaali aanahambo pohambo yedhina Ohangwena yili moshikandjohogololo Tsandi oya sile momuthima nenge moshikweyo omanga yali taya kambadhala okuhupithathana Etine oshiwike shayi.

Omunahambo omutitatu okwa ka hulithila koshipangelo sha Shakati. Omulumentu nguka okwa adhika kopolisi ta kondjo nomwenyo eli moshikweyo , sho mbaka ye shi pondola okumu kuthamo.

Okwa hokololwa kutya omunamimvo 31 Amunyela Augustus Heitha gwokEtapaela, Joseph Jackson, gwOkafitukashau moshikandjohogololo shaTsandi na Martin Endjala gwomimvo 43 gwokIipandahangano moshikandjohogololo shaGongo ngoka aadhika natango ena omwenyo eli moshikweyo, oya li taya hupupulula oshikweyo shoka pamwe na mu kwawo ngoka a hupu sho oshiningwanima shika sha ningwa.

Opolisi moshitopolwa Omusati oya koleke oshiningwanima shika, ya ti osheeti sheso inashi tseyika manga, otashi ka tseyika ashike konima ngele omidhimba dhaantu mbaka yatatu dha tandwa.

“Shoka sheeta eso inashi tseyika natango , oshoka omidhimba ka dha li dha tandwa nokukonakonwa pethimbo ndika, osho omupopiliko gwopolisi moshitopolwa shoka, Shisande Hezekiel Hamalwa a tile.

Okwa hokololwa kutya aalumentu mbaka yane oya li taya ningi omalufo okuya moshikweyo nokutapa mo omunoko. Joseph Jackson ngoka a li moshikweyo tango anuwa okwa indile opo a kuthwemo oshoka kali we eweteko nawa. Jackson okwa landulwa ku Amunyela August Heitha ngoka a tapa mo ashike omunoko omushona ye ota indile opo a pewe omeya oshoka okuuvite enota.

“Aanangundu mbaka anuwa oye mu umbile ekende lyomeya moshikweyo,” Hamalwa ta hokolola.

Konima yokunwamo momeya, Heitha anuwa okwi ihatapo, ye Jackson ota shunamo moshikweyo opo e ke mu hupithe, ndele na ye okwa sile mo.

Martin Endjala okwa yi mo wo moshikweyo opo andola a kwathele yakwawo ndele okwa gwile mo moshikweyo nokwa adhika kopolisi nomwenyo tagu talwa pothingo sho ndjika ya tondoka onkugo konima yoku ithwanwa komulumentu omutine ngoka inaa kambadhala we oku ya mo momuthima ngoka.

Endjala okwa li a falwa mbala koshipangelo shepangelo koTsandi naamoka okwa pitililemo noku tuminwa koshipangelo shaShakati. Endjala okwa manene oondjenda dhe Etitano oshiwike shayi monaasalesa ya Shakati.

Omulumentu omutine ngoka a li na yakwawo pehupo nokwa mono shoka shaningwapo ina kambadhala we oku ya moshikweyo ndele okwa dhengele opolisi opo yi kwathele okuhupitha aalumentu yakwawo yatatu.

Opolisi oya endelele okuthika poshikweyo ando opo yi hupithe aalumentu mboka.

“Tse aapolisi otwa yamukula mbala nopethimbo onkene otwa li twa kutha omulumentu gumwe gwaambaka moshikweyo ena omwenyo,” osho Hamalwa a ti.

 

LEAVE A REPLY

Please enter your comment!
Please enter your name here