Yandeni okudhanena iitopitha

0
205

OSHIVELO – Kuyele oshiwike shika ombelewa yopolisi moshitopolwa Oshikoto oyali ya gandja etumwalaka opo aakwashigwana ya yande okudhanena iitopitha mbyoka yi ihanena moshitopolwa.

Omugandji guuyelele mbuka kiikundaneki Sara Nehale okwa ti ombelewa ndji hayi longo niitopitha mOshikoto oya lopotelwa aakwashigwana taya dhanene iitopitha yo yamwe ta yeyi toola noku tula muushako na yamwe oyayi nayo komagumbo gawo.

“Oshinima shino osha konekiwa unene momudhingoloko gwaShivelo mono muna okamba yaapolisi, olundji aapolisi ohaya kala noku umba oondjembo ashike iitopitha yimwe ihayi kala ya topa nawa nolundji shampa ya mana okuumba oha ye yi toolapo ashike ethimbo limwe momatumpakano iha ye yi manapo osho nee to kaadha konima aakwashigwana ta yeyi toolapo no kuyi fala komagumbo gawo,” Nehale tati.

Okwa holola kutya oshinima shika shiitopitha osha nika oshiponga unene no tashi vulika shi monithe omuntu oshiponga no ku faalela oomwenyo dhaantu oyendji.

” Olundji nopendji otatu lopotelwa aantu taya dhanene iitopitha , otwa kambadhala tu ende tatu kongo pomahala mpoka twa lopotelwa opo tu kuthepo iitopitha mbyoka tu gamene aakwashigwana yetu,” Nehale ta popi ngaaka.

Opolisi yomOshikoto kumwe nombelewa ndjoka yomakonakono giitopitha oya indile opo kehe ngoka to ka mona oshitopitha nenge oshitenda tashi limbilike wu kale wa ninga ekwatathano nopolisi yili popepi nangoye opo wu lopote oshinima shoka sho shi kale sha ilwapo meendelelo.

Oya kumagidha omuntu kehe ta ka mona iitopitha nenge iitenda mbyoka opo kee yi gume oshoka otashi ke mu monitha oshiponga. Ta ya ti ngoka ta ka monika ta toola iitopitha otaka kala a katukilwa onkatu mbala ye a mangwepo.

Oya indile woo aakwashigwana ya longele kumwe nopolisi ya lopote iinima mbyoka tayi limbilike yo yaa yi gume nande oshoka anuwa oya nika oshiponga noonkondo.

 

LEAVE A REPLY

Please enter your comment!
Please enter your name here