Aailongi yomalaka nomithigululwakalo poUnam ya dhana Oshipe

0
293

WINDHOEK – Aailongi yoshiputudhilo shopombanda shaNamibia (Unam), osho ya dhana oshitopolwa shawo oshitine Oshipe, pehala lyomaulikilo gomithigululwakalo moUnam Olyomakaya ya piti.

Gumwe gwomaanenentu mboka yali ya kwatela oshiningwanima shika komeho Omundohotola  Petrus  Angula Mbenzi okwa ti, oshitopolwa shika shoshipe ooshoka moka aalongwa haya ulike shoka ya ilonga momukokomoko gwomvula, onga otutsu mo ka haya pewa iitsa, shi ikwatelela kiilonga yawo.

Oshipe shika osha li sha egululwa komunasikola Naapota Nembwaya ngoka ali ape ompito aanasikola ya ulike oonkuluhedhi dhomithigululwakalo dhawo. Oshituthi osha li sha tameke nokatetekelitho, moka aalongwa yali ya ulike nkene epititho lyoombuto ha li ningwa paufupi.

Iiningwanima mbyoka yali ya ningwa pOshipe ongaashi aanasikola taya ulike iipe yiilya, Iilyawala, ontaku, omalovu giilya, iikwila, oonyandi niikwawo oyindji. Kakele kokuulika oshipe, aalongwa oya li ishewe ya longekidhilwa omainyanyudho ga kwata miiti ngaashi okudhana odule, uuholo, okunuka omupembe nOdota.

Aailongi mboka yali ya holoka oyali ya nyanyukwa noonkondo okuulika omithigululwakalo dhawo, oshoka oyendji oya zile ko taya ligola yo taya ti esiku olya endele nawa oshoka oyali ya pewa ishewe ompito okulya iikulya mbyoka yomuthigululwako ngaashi oondjuhwa dhOshiwambo, iithima niikwawo oyindji. Mbenzi okwa gwedhanpo ta ti nando shika oshali ashike okakonakono okashona okukonakona aanasikola, mbaka oya tengeneka ye ke shi ninge oshituthi shopamuthika gwopombanda komasiku gokomeho.

LEAVE A REPLY

Please enter your comment!
Please enter your name here