Aatiligane ya patuluka nokusa uunye epangelo lyaBotha

0
263

Epangelo lyaBotha olya kala lya tokola okuhanagulapo Swapo nelalakano okufundja uuyuni opo wi itaale kutya lyo olyo lyeeta uudemokoli pwaana Swapo. Ihe esindano kuyo olya li itaali vulu  okwaadhika oshoka tse otwa li twa tsikile oku ehameka aakwiita yepangelo ndyoka , moku homona  ookamba dhawo dhaakwiita, moku yahamo oondhila dhawo dhiita oshowo okupiyaganeka egandjo lyolusheno, omeya nomakwatathano gopangodhi.

Omukumo ogwa li pombanda mokati kaaniilonga oshowo aanasikola yaNamibia.Omahangano gakalelapo yaaniilonga oga adha omasindano omanene sho ehangano laaniilonga yomoomina nenge [Mineworkers Union of Namibia] lya dhikwapo omumvo 1986 oshowo ndyoka hali ithanwa [Namibian Food and Allied Workers Union] nomakwawo ogendji.

Epangelo lyokatongotongo olya li lya thiminikwa koombedhi ndhoka lyo lya pewa kuuyuni omolwa eihumbato lyalyo ewinayi kombinga yuuthemba waaniilonga unene tuu aaluudhe. Olya li lya kutha oonkatu oku yululula oompango dhalyo oombwinayi nokupa aaniilonga aaluudhe uuthemba okukondjela omauwanawa gawo okupitila momahangano gawo gaaniilonga. Oshinima shika osha hwameke aawiliki yaaniilonga moNamibia opo ya tungepo omahangano gaaniilonga omape  kohi yewiliko lyehangano lyaaniilonga  lyopashigwana lya Namibia, ndyoka lya dhikwapo koSWAPO. Ndika olya kala mekwatathano ewanawa naaniilonga meni lyoshilongo.

Moshilongo omwa li wo omainyengo omanene gaanasikola ogendji gokutinda okuya kootundi , naashika osha dhigupalele epangelo lyokatongo opo li tsikile nokupangela Namibia ngaashi lya li lya hala.Pethimbo ndika South Africa opo a thiminikile Namibia epangelo lyopakathimbo nonando mwaandyoka ka mwali nando omuluudhe gumwe ngoka ena omutalelo nondhilo yuukondjelimanguluko meni nopondje yoshilongo.

Mokati kiiningwanima ayihe mbika oshowo ehepeko lyaantu kepangelo lyuukoloni lya South Africa ndyoka lya li pokuhulapo moNamibia, otandi ka tumbulapo ashike oshiningwanima shedhipago poshigongi shoSwapo moKatutura momasiku 11Novemab 1986 sho gumwe gwomaakondjelimanguluko yotango , Immanuel Shifidi ngoka a li a dheulilwa uukwiita pOmugulu-gOmbashe a dhipagwa kaakwiita ya South Africa.Shifidi okwa adhika opo a egululwa mondholongo kontuntu ya Robben konima yemangululo lya Ya Toivo. Nakusa Shifidi okwa li a kala mondjedhililo kontuntu ndjoka  uule womimvo 18.Pethimbo lyokudhipagwa kwe ye okwa li omuniilonga ha longele Ongongahangano yoongeleka moNamibia. Okwa li poshigongi shopambili shaningwa sha gama koUN, shoka sha li sha ponokelwa kiilyo yoBattalion 101 na okwa li a tsuwa okusa ku gumwe gwakwiita mboka.

Omukwiita gworanga yuuColonel aakwiita yatatu aatiligane nashisande omuluudhe ha ithanwa Eusebius Kashindi Jack ja Jack oya li ya holoka mompangu omolwa edhipago ndika, ndele omatamanekeo  ngaka oga kuthwapo palombwelo lya PW Botha molwashoka  anuwa mbaka “oya longo nawa meinekelo sho ya li taya kondjitha uukulo moshitopolwa shomalugodhi.”

Ompangu Onenene ya Windhoek  oya li ya ekelehi eidhopomo lya Botha, moshipotha shika ihe nguka okwa ka ninga eindilo opo etalululo lyasho li ningwe. Oonakufekelwa mbaka inaya ka pangulwa we sigo onena kombinga yoshinima shika. Naashika osha ulike kutya South Africa okwa li ta ningi ngaashi a hala nonando moshilongo omuna epangelo lyopokati.

Pethimbo ndika aatiligane mboka ya li ya tonata oya li ye weteko kutya onakuyiwa yawo oyi li peni, natse otwa kambadhala ngaashi tatu vulu okuya pa einekelo moNamibia ya manguluka.Iigongi moLusaka naSweden 1986 oshowo mo Kambwe, Zambia, 1988, oye ya kwashilipaleke kutya epangelo lyoSwapo itali ti epandela etiligane kombanda yoVenduka ngaashi iifundja mbyoka ya kala haya lombwelwa ku Vorster oshowo kuAmushanga gwIikwapondje gwa USA, Ndjayi Alexander Haig.

Otandi dhimbulukwa metsakaneno limwe moKambwe sho tuuvu kutya Advocate Frank ngoka a li oshilyo shongundu yo Nationalist Party a kalelapo uumbugantu wa Namibia moParliamende yaatiligane okwa li a valwa moshiwike shoka, otwe mu imbile eimbilo lyenyanyu lyevalo lye, naashika okwa li shiinyengitha omutima gwe. Omukulukadhi gwe okwa ka ninga oshilyo shOmutumba gwOpashigwana mongundu yo DTA konima sho oshilongo sha manguluka.. Ngame onda li nda ulike omwanamati gwe  omupanguli ongo Komufala moshinakugwanithwa shimwe okukonakona uulingilingi mepangelo.

Omutiligane gumwe ngoka a ka joina Swapo mo 1984 oye omutseyiveta Anton Lubowski. Onde mu tsakaneke omumvo ngoka sho iile koParis a li eeta ehongwathano lyonguti lya tumwa kaakalimo yomoLindili oku li gandja kOminista Yiikwapondje ya France Omusamane, Claude Cheysson. Epangelo lya South Africa olya li lya  tindi opo omukaleliposhilongo gwa France a ka taambe omagano ngoka moNamibia. Otwa li twa simaneka Omusamane  Cheysson sho a tindi ethaneko kutya ongundu yoContact group yiilongo yoKuuninginino  na yi taambeko oshinima shekwatathano, kokutya emangaluko lya Namibia na li kwatathanithwe nezemo lyaakwiita ya Kuba moAngola , oshinima shika osha li wo sha tindwa kepangelo lya Canada.Omapangelo giilongo mbika France na Canada oga li kohi yelelo lya Francois Mitterand oshowo Trudeau.Fransa na Canada oya ndhindhilike kutya epangelo lya   Reagan olya li lya hala okutula epangelo lyomavigumbo moNamibia kohi yekondololo lyepangelo lya Botha.

Lubowski okwa li a ningile Swapo oshindji momimvo dha ka landulako dhili ne na okwa ulike kutya okushi oku inekelwa. Okwa li gumwe gwaawiliki yoSwapo ngoka a kwatelwe omumvo 1987 moVenduka. Omanga shika inaashi ningwa okwa li wo oshihauto she sha pumwa nayi koshiwawo, shoka a landula sigo oosho a kanithile shika posasiona yopolisi. Okwa li iinekela shinene aapangeli, kali etu fa tse mboka twa li tuna ontseyo oyindji moshinima shiilonga yomatilitho, omahepeko nomambandameko haga ningwa kepangelo lyokatongo lya South Africa.Lubowiski okwa dhipagwa medhipago lyoshiyakela momasiku 12 Septemba 1989 komutumwa gwepangelo lyokatongo. Ndjayi Magnus Malan okwa li a nyateke nokupopya nayi kombinga yeso lye a ti anuwa nguka okwa li miilonga yomonanguwi yetanga lyegameno lya South Africa, omupopyo ngoka ogwa li iifundja.

South Africa okwa longitha oshindji mokuhehela aantu mboka ya taandelitha iifundja mbyoka ngaashi sha hokololwa ku yamwe yomiilongithwa ya South Africa mbyoka ya fadhukile koSwapo. Otwa li twa pewa ombedhi shono twa edhililile aantu yamwe mboka twa dhimbulula kutya oya li ya tumwa kepangelo lyokatongo opo ya yonepo oSwapo okuza meni lyayo.Ongundu yimwe hayi ithanwa Parents’ Committee (mewiliko lya Stella Boois na Philemon Festus Ipumbu, ngoka molwomatompelo gemwene a li iiyithana Phil ja Nangolo), yo mbaka oya futilwa kongundu yimwe miilonga yegameno lyaSouth Africa, oye ya ko Europa okunyenyeta kombinga yoonkwatwa ndhoka dha edhililwa koSwapo.

Sho nda thiki poparliamende moStrasbourg, onda tsakanekwa kongundu ndjika tayi igidha nokupula” Aanona yetu oye li peni”Konima ashike sho twa piti puyo ye gumwe gwomuyo ota lesha omushangwa  tati anuwa onda ponokele omukiintu gumwe ngoka a li ta holola omadhiladhilo gwomongundu yawo. Ehokololo ndika olya li lya taandelithwa ku Ndowishi gwokUuninginino unene kiikundaneki yoshilongo shoka mbyoka oyo ya gandja oshimaliwa  oku enditha okangundu haka. Aakiintu mboka pamwe na Phil Ya Nangolo oya shuna koNamibia na oya tsikile okulongithwa ku South Africa miilonga ye yuudhudhu.

Oshinima shoonkwatwa dha edhililwa koSWAPO osha kala tashi longithwa unene nopethimbo lyiikonga yomahogololo mo1989. Eeno osho shili kutya otwa li twa edhilila nokukwata oohandimwe mboka twa ndhindhilike kutya oyo oondaadhi naalongithwa ya South Africa. Yamwe yomuyo oya etitha eso mokati kaakwaSwapo ngaashi mo Shatotwa moZambia lyokuuninginino oshowo mo Cassinga. Okumonika kwomahala ngaka ku South Africa osha ningwa melongelokumwe noondaadhi ndhoka dha tumwa okuninga dhafa iilyo yoshili yoSWAPO ndele nani odhi li momake gepangelo lyokatongotongo.

Swapo okwa lundilwa anuwa a edhilila aantu mbaka shaali pauyuki, ndele tse otwa li tweya edhilile oshoka yo oondaadhi dhomutondi gwetu.Tse otwa li tatu kondjo nomutondi omunankondo ye ishewe omudhudhu. Miita oyindji aantu yoludhi ndoka ohaya dhipagwa kwaamboka ye ya kwata . Ngele otwa lundilwa kutya otwa hepeke mbaka, shika oshishona okuyeleka nuudhudhu wa longelwa aantu yetu kepangelo lya South Africa, ndyoka lya dhipaga, lya hepeke, nokuhepekelela aantu yetu uule womimvo odhindji, ngaashi ya dhipaga aantu yetu poShatotwa oshowo poCassinga.Yamwe yomaahepeki yaantu yetu oye li mopolisi ya Namibia sigo onena omolwa edhiminathanepo lyopashigwana. Tse otwa hala okuthigapo epandja ndyoka noku itula metungululo lyopashigwana  pamahupilo molwuuwanawa waaNamibia ayehe.

LEAVE A REPLY

Please enter your comment!
Please enter your name here